ഐ.പി.എൽ 2026-ന് പിന്നാലെ ഇന്ത്യൻ ക്രിക്കറ്റ് ടീമിൽ വൻ അഴിച്ചുപണിക്ക് ഒരുങ്ങി ബി.സി.സി.ഐ ടി 20 യിൽ സൂര്യകുമാറിനെ മാറ്റി ശ്രേയസിനെ നായകനാകുന്നത് സംബന്ധിച്ച വാർത്ത വന്നിരുന്നു. ഇപ്പോഴിതാ ഏകദിനത്തിലും നായക സ്ഥാനത്തിന് മാറ്റം ഉണ്ടാകും എന്ന വാർത്തയാണ് പുറത്തുവരുന്നത്. ഈ സ്ഥാനത്തേക്കും ശ്രേയസ് അയ്യരെ പരിഗണിക്കാനാണ് അജിത് അഗാർക്കർ നയിക്കുന്ന സെലക്ഷൻ കമ്മിറ്റിയുടെ തീരുമാനം.
ഐ.പി.എല്ലിലെ മിന്നും പ്രകടനവും പരിക്കിൽ നിന്നുള്ള ശക്തമായ തിരിച്ചുവരവുമാണ് ശ്രേയസ് അയ്യരെ നായകസ്ഥാനത്തേക്ക് എത്തിക്കുന്നത്. നിലവിലെ ടി20 ക്യാപ്റ്റൻ സൂര്യകുമാർ യാദവിന്റെ മോശം ഫോമും ഏകദിന നായകൻ ശുഭ്മാൻ ഗില്ലിനെ സംബന്ധിച്ചുള്ള പുതിയ തീരുമാനങ്ങളുമാണ് ഈ മാറ്റത്തിന് പിന്നിൽ. ടി20, ഏകദിന ഫോർമാറ്റുകളിൽ ടീമിനെ നയിക്കാൻ ഒരൊറ്റ താരത്തെ മതിയെന്നാണ് ബി.സി.സി.ഐയുടെ നിലപാട്. ഇതിനായി ശ്രേയസ് അയ്യരെയാണ് ടോപ്പ് ലിസ്റ്റിൽ ഉൾപ്പെടുത്തിയിരിക്കുന്നത്.
ഐ.പി.എല്ലിൽ തന്റെ ഫ്രാഞ്ചൈസിയെ പക്വതയോടെ നയിച്ച ശ്രേയസിന്റെ പ്രകടനത്തിൽ ബോർഡ് സംതൃപ്തരാണ്. പരിക്കുകൾ താരത്തിന് തിരിച്ചടിയായെങ്കിലും അദ്ദേഹത്തിന്റെ കഴിവിൽ സെലക്ഷൻ കമ്മിറ്റിക്ക് പൂർണ്ണ വിശ്വാസമുണ്ട്. ടി20 ലോകകപ്പ് ജേതാവായ നായകനാണ് സൂര്യകുമാർ എങ്കിലും നിലവിലെ ഫോം ആശങ്കയുണ്ടാക്കുന്നു. ഗില്ലിനെ ഏകദിന നായകനായി നേരത്തെ നിശ്ചയിച്ചിരുന്നെങ്കിലും, ശ്രേയസിനെ രണ്ട് ഫോർമാറ്റിലും പരീക്ഷിക്കാനാണ് മാനേജ്‌മെന്റ് താല്പര്യപ്പെടുന്നത്.
ജൂൺ 6-ന് അഫ്ഗാനിസ്ഥാനെതിരായ ഏക ടെസ്റ്റോടെയാണ് ഇന്ത്യയുടെ അന്താരാഷ്ട്ര സീസൺ തുടങ്ങുന്നത്. തുടർന്ന് അയർലൻഡ്, ഇംഗ്ലണ്ട് പര്യടനങ്ങളിൽ പുതിയ വൈറ്റ് ബോൾ ടീമിനെ കാണാനാകും.
