ഇന്ത്യൻ ക്രിക്കറ്റിലെ ഏറ്റവും പുതിയ അത്ഭുതബാലൻ വൈഭവ് സൂര്യവംശിക്ക് ഒടുവിൽ കാത്തിരുന്ന ഇന്ത്യൻ സീനിയർ ടീമിലേക്ക് വിളി എത്തിയിരിക്കുകയാണ്. ഐപിഎൽ 2025-ൽ ഗുജറാത്ത് ടൈറ്റൻസിനെതിരെ വെറും 35 പന്തിൽ സെഞ്ച്വറി അടിച്ചുകൊണ്ട് ക്രിക്കറ്റ് ലോകത്തെ ഞെട്ടിച്ച ഈ ഇടങ്കയ്യൻ ബാറ്റ്സ്മാൻ, ഐപിഎൽ 2026-ൽ ആകെ താണ്ഡവമാടുകയായിരുന്നു.
ഈ ഐപിഎൽ സീസണിൽ 776 റൺസ് അടിച്ചുകൂട്ടി ശുഭ്മൻ ഗിൽ, സായ് സുദർശൻ, വിരാട് കോഹ്‌ലി തുടങ്ങിയ വമ്പന്മാരെ അട്ടിമറിച്ചാണ് വൈഭവ് ‘ഓറഞ്ച് ക്യാപ്പ്’ സ്വന്തമാക്കിയത്. ഈ തകർപ്പൻ പ്രകടനമാണ് 15-ാം വയസ്സിൽ ഏഷ്യൻ ഗെയിംസിനുള്ള ടീമിലും അയർലൻഡ്, ഇംഗ്ലണ്ട് പര്യടനങ്ങൾക്കുള്ള സീനിയർ ടി20 ടീമിലും താരത്തിന് ഇടംനേടിക്കൊടുത്തത്.
ശനിയാഴ്ച വാർത്താസമ്മേളനം തുടങ്ങുന്നതിന് വെറും ഒരു മണിക്കൂർ മുൻപ് മാത്രമാണ് വൈഭവിനെ ടീമിലെടുക്കുന്ന കാര്യത്തിൽ അന്തിമ തീരുമാനമായതെന്ന് ബിസിസിഐ സെക്രട്ടറി ദേവാജിത് സൈകിയ വെളിപ്പെടുത്തി. ജൂൺ 9 മുതൽ 21 വരെ ശ്രീലങ്കയിൽ നടക്കുന്ന മുക്കോണ പരമ്പരയ്ക്കുള്ള ഇന്ത്യ ‘എ’ ടീമിലും വൈഭവിനെ ഉൾപ്പെടുത്തിയിട്ടുണ്ട്. എന്നാൽ ഇതിന് തൊട്ടുപിന്നാലെ, ജൂൺ 26-ന് ഇന്ത്യ അയർലൻഡുമായി രണ്ട് മത്സരങ്ങളുടെ ടി20 പരമ്പര കളിക്കുന്നുണ്ട്. രണ്ട് ടീമിലും അംഗമായതുകൊണ്ട് താരത്തിന് ഏറ്റവും അനുയോജ്യമായത് എന്താണെന്ന് ബിസിസിഐ ആലോചിക്കുമെന്നും, നിലവിൽ അയർലൻഡ്-ഇംഗ്ലണ്ട് പര്യടനങ്ങൾക്കാണ് മുൻഗണന നൽകുന്നതെന്നും സൈകിയ വ്യക്തമാക്കി.
അയർലൻഡ്, ഇംഗ്ലണ്ട് പര്യടനങ്ങൾക്കുള്ള ഇന്ത്യൻ ടി20 സ്ക്വാഡ്:ശ്രേയസ് അയ്യർ (ക്യാപ്റ്റൻ), വൈഭവ് സൂര്യവംശി, അഭിഷേക് ശർമ്മ, സഞ്ജു സാംസൺ (വിക്കറ്റ് കീപ്പർ), ഇഷാൻ കിഷൻ (വിക്കറ്റ് കീപ്പർ), ശിവം ദുബെ, തിലക് വർമ്മ, നിതീഷ് റെഡ്ഡി, അക്സർ പട്ടേൽ, വാഷിംഗ്ടൺ സുന്ദർ, വരുൺ ചക്രവർത്തി, രവി ബിഷ്‌ണോയ്, മുഹമ്മദ് സിറാജ്, ഹർഷിത് റാണ, അർഷ്ദീപ് സിംഗ്, പ്രിൻസ് യാദവ്.
ഏഷ്യൻ ഗെയിംസ് 2026-നുള്ള ഇന്ത്യൻ സ്ക്വാഡ്:
ശ്രേയസ് അയ്യർ (ക്യാപ്റ്റൻ), വൈഭവ് സൂര്യവംശി, അഭിഷേക് ശർമ്മ, സഞ്ജു സാംസൺ (വിക്കറ്റ് കീപ്പർ), ഇഷാൻ കിഷൻ (വിക്കറ്റ് കീപ്പർ), ശിവം ദുബെ, തിലക് വർമ്മ, നിതീഷ് റെഡ്ഡി, അക്സർ പട്ടേൽ, വാഷിംഗ്ടൺ സുന്ദർ, വരുൺ ചക്രവർത്തി, രവി ബിഷ്‌ണോയ്, മുഹമ്മദ് സിറാജ്, ഹർഷിത് റാണ, അർഷ്ദീപ് സിംഗ്, ജസ്പ്രീത് ബുമ്ര.
(ഏഷ്യൻ ഗെയിംസ് ടീമിൽ പ്രിൻസ് യാദവിന് പകരം ജസ്പ്രീത് ബുമ്ര എത്തും എന്നതാണ് ഏക മാറ്റം).
