ഒമാൻ തീരത്ത് കാണാതായ മൂന്ന് ഇന്ത്യൻ കപ്പൽ ജീവനക്കാരും കൊല്ലപ്പെട്ടു, കടുത്ത അമർഷവുമായി ഇന്ത്യ; അമേരിക്കൻ നയതന്ത്രജ്ഞനെ വിളിച്ചുവരുത്തി പ്രതിഷേധിച്ചു

ഗൾഫ് മേഖലയിൽ അന്താരാഷ്ട്ര ചരക്കുകപ്പലുകൾക്ക് നേരെ അമേരിക്കൻ സേന നടത്തുന്ന ആക്രമണങ്ങളിൽ കടുത്ത ആശങ്കയും പ്രതിഷേധവുമറിയിച്ച് ഇന്ത്യ. ഒമാൻ തീരത്ത് കഴിഞ്ഞദിവസമുണ്ടായ യുഎസ് വ്യോമാക്രമണത്തിൽ കാണാതായ മൂന്ന് ഇന്ത്യൻ ജീവനക്കാരും മരണപ്പെട്ടതായി കേന്ദ്ര തുറമുഖ-ഷിപ്പിംഗ് മന്ത്രി സർബാനന്ദ സോനോവാൾ സ്ഥിരീകരിച്ചു. കപ്പലിലെ ജീവനക്കാരായ ആദിത്യ ശർമ്മ (ഡെക്ക് കേഡറ്റ്), ശിവാനന്ദ് ചൗരസ്യ (എഞ്ചിൻ ഫിറ്റർ), പട്നാല സുരേഷ് (ചീഫ് എഞ്ചിനീയർ) എന്നിവരാണ് ദരുണമായി കൊല്ലപ്പെട്ടത്. ആക്രമണത്തെ ശക്തമായി അപലപിച്ച വിദേശകാര്യ മന്ത്രാലയം, ഗൾഫ് മേഖലയിൽ കപ്പൽ ജീവനക്കാർക്ക് നേരെ വർദ്ധിച്ചുവരുന്ന ഇത്തരം ആക്രമണങ്ങൾ അതീവ ആശങ്കാജനകമാണെന്നും ഇവ ഉടനടി അവസാനിപ്പിക്കണമെന്നും ആവശ്യപ്പെട്ടു.

‘എംടി സെറ്റബെല്ലോ’ (MT Settebello) എന്ന എണ്ണക്കപ്പലിന് നേരെയാണ് ഒമാൻ തീരത്തെ തന്ത്രപ്രധാനമായ ഹോർമുസ് കടലിടുക്കിന് സമീപം യുഎസ് സെൻട്രൽ കമാൻഡ് വ്യോമാക്രമണം നടത്തിയത്. ഇറാനിൽ നിന്നുള്ള എണ്ണക്കടത്ത് തടയാൻ ഏർപ്പെടുത്തിയ ഉപരോധം ലംഘിച്ചുവെന്നും നിർദ്ദേശങ്ങൾ പാലിച്ചില്ലെന്നും ആരോപിച്ചായിരുന്നു അമേരിക്കൻ യുദ്ധവിമാനം കപ്പലിന്റെ എഞ്ചിൻ റൂം ലക്ഷ്യമാക്കി ബോംബാക്രമണം നടത്തിയത്. ആക്രമണം നടക്കുമ്പോൾ കപ്പലിൽ 24 ഇന്ത്യൻ ജീവനക്കാരാണ് ഉണ്ടായിരുന്നത്. ഇതിൽ 21 പേരെ ഒമാൻ അധികൃതരുടെ സഹായത്തോടെ ഇന്ത്യ വിജയകരമായി രക്ഷപ്പെടുത്തിയെങ്കിലും എഞ്ചിൻ റൂമിലുണ്ടായിരുന്ന മൂന്ന് ഇന്ത്യക്കാരെ കാണാതാവുകയായിരുന്നു. തുടർന്ന് നടത്തിയ തിരച്ചിലിലാണ് ഇവരുടെ മൃതദേഹങ്ങൾ കണ്ടെത്തിയത്. ഉത്തർപ്രദേശ്, ആന്ധ്രാപ്രദേശ്, ഹിമാചൽ പ്രദേശ് സ്വദേശികളായ ഇവരുടെ വേർപാട് ഇന്ത്യൻ നാവിക സമൂഹത്തിന് വലിയ നഷ്ടമാണെന്ന് കേന്ദ്രമന്ത്രി സോനോവാൾ കുറിച്ചു. രക്ഷപ്പെടുത്തിയ ജീവനക്കാരെയും അന്തരിച്ചവരുടെ ഭൗതികശരീരങ്ങളും എത്രയും വേഗം നാട്ടിലെത്തിക്കാൻ ഉദ്യോഗസ്ഥർക്ക് കർശന നിർദ്ദേശം നൽകിയിട്ടുണ്ട്.

സംഭവത്തിന് പിന്നാലെ ഇന്ത്യയിലെ അമേരിക്കൻ ചാർജ് ഡി അഫയേഴ്സ് (ഡെപ്യൂട്ടി ചീഫ് ഓഫ് മിഷൻ) ജേസൺ മീക്സിനെ വിദേശകാര്യ മന്ത്രാലയം നേരിട്ട് വിളിച്ചുവരുത്തി ഔദ്യോഗികമായി ശക്തമായ പ്രതിഷേധം (Demarche) രേഖപ്പെടുത്തി. അന്താരാഷ്ട്ര കപ്പൽ ചാലുകളിലൂടെയുള്ള സുരക്ഷിതമായ യാത്ര ഉറപ്പാക്കണമെന്നും സാധാരണക്കാരായ കപ്പൽ ജീവനക്കാരുടെ ജീവൻ അപകടത്തിലാക്കുന്ന നടപടികൾ ഒരുതരത്തിലും അംഗീകരിക്കാനാവില്ലെന്നും ഇന്ത്യ വ്യക്തമാക്കി. പശ്ചിമേഷ്യയിൽ നിലനിൽക്കുന്ന സംഘർഷങ്ങളുടെ പശ്ചാത്തലത്തിൽ വാണിജ്യ കപ്പലുകളെയും സാധാരണക്കാരെയും ലക്ഷ്യമിട്ടുള്ള ആക്രമണങ്ങൾ വർദ്ധിക്കുന്നത് ആഗോള സമ്പദ്‌വ്യവസ്ഥയെയും സുരക്ഷയെയും ദോഷകരമായി ബാധിക്കുമെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ ഓർമ്മിപ്പിച്ചു. മേഖലയിൽ സമാധാനം പുനഃസ്ഥാപിക്കാൻ നയതന്ത്ര ചർച്ചകളിലൂടെ അടിയന്തരമായി സംഘർഷം ലഘൂകരിക്കണമെന്നാണ് ഇന്ത്യയുടെ നിലപാട്.