റിലയൻസ് ഇൻഡസ്ട്രീസ് ലിമിറ്റഡിന്റെ (RIL) 49-ാമത് വാർഷിക പൊതുയോഗത്തിൽ വൻ പ്രഖ്യാപനങ്ങളുമായി റിലയൻസ് ജിയോ ഇൻഫോകോം ലിമിറ്റഡ് (RJIL) ചെയർമാൻ ആകാശ് മുകേഷ് അംബാനി. 2025-26 സാമ്പത്തിക വർഷത്തിലും വിപണിയിൽ തങ്ങളുടെ അപ്രമാദിത്വം നിലനിർത്തിക്കൊണ്ടുള്ള വൻ കുതിപ്പാണ് ജിയോ നടത്തിയിരിക്കുന്നത്. കമ്പനിയുടെ ആകെ ഉപഭോക്താക്കളുടെ എണ്ണം 52.4 കോടി കടന്നതായും, നികുതിക്ക് ശേഷമുള്ള അറ്റാദായം (Profit After Tax) ചരിത്രത്തിലാദ്യമായി 30,000 കോടി രൂപ മറികടന്നതായും വാർഷിക പൊതുയോഗത്തിൽ അദ്ദേഹം ഔദ്യോഗികമായി അറിയിച്ചു. ജിയോയുടെ വൻ വിജയത്തിന് പിന്നാലെ കമ്പനിയുടെ ഏറെ കാത്തിരുന്ന ഐപിഒ (IPO) സംബന്ധിച്ച സുപ്രധാന വിവരങ്ങളും ഇത്തവണത്തെ വാർഷിക പൊതുയോഗത്തിന്റെ പ്രധാന ആകർഷണമായി മാറി. ജിയോ പ്ലാറ്റ്‌ഫോംസ് ഐപിഒയ്ക്കായുള്ള ഡ്രാഫ്റ്റ് പേപ്പറുകൾ (DRHP) സെബിക്ക് സമർപ്പിക്കാൻ ബോർഡ് അനുമതി നൽകിയതായും 27 കോടി ഇക്വിറ്റി ഷെയറുകൾ ഉൾപ്പെടുന്ന പബ്ലിക് ഇഷ്യൂവാണ് ലക്ഷ്യമിടുന്നതെന്നും യോഗത്തിൽ വ്യക്തമാക്കപ്പെട്ടു.
കഴിഞ്ഞ പത്ത് വർഷത്തെ ജിയോയുടെ പ്രയാണത്തെക്കുറിച്ച് സംസാരിക്കവേ, ഇന്ത്യയിലെ ടെലികോം-ഡിജിറ്റൽ സേവന രംഗത്ത് കമ്പനി കൈവരിച്ച വളർച്ച അസാധാരണമാണെന്ന് ആകാശ് അംബാനി ചൂണ്ടിക്കാട്ടി. ഈ സാമ്പത്തിക വർഷത്തിൽ കമ്പനിയുടെ വരുമാനം 14.6 ശതമാനം വർദ്ധിച്ച് 1,46,885 കോടി രൂപയിലെത്തി. ഈ കാലയളവിൽ ജിയോയുടെ 5ജി ഉപഭോക്താക്കളുടെ എണ്ണം 26.8 കോടി പിന്നിട്ടു എന്നത് കമ്പനിയുടെ ജനപ്രീതി വർദ്ധിക്കുന്നതിന്റെ തെളിവാണ്. ചൈനയ്ക്ക് പുറത്ത് ഒരു രാജ്യത്ത് മാത്രമായി പ്രവർത്തിക്കുന്ന ലോകത്തിലെ ഏറ്റവും വലിയ 5ജി ശൃംഖലയായി ഇതോടെ റിലയൻസ് ജിയോ മാറി. 2025-26 സാമ്പത്തിക വർഷത്തിൽ മാത്രം 7.7 കോടി പുതിയ 5ജി ഉപഭോക്താക്കളെയാണ് ജിയോ സ്വന്തമാക്കിയത്. കൂടാതെ നെറ്റ്‌വർക്കിലെ മൊത്തം ഡാറ്റാ ട്രാഫിക് 30.8 ശതമാനം വർദ്ധനവോടെ 241 എക്സാബൈറ്റിൽ (exabytes) എത്തിയതായും ഒരു ഉപഭോക്താവിന്റെ ശരാശരി പ്രതിമാസ ഡാറ്റാ ഉപയോഗം 42.3 ജിബി ആയി ഉയർന്നതായും റിപ്പോർട്ടിൽ പറയുന്നു.
ടെലികോം രംഗത്തിന് പുറമെ തങ്ങളുടെ ഫിക്സഡ് ബ്രോഡ്ബാൻഡ് സേവനമായ ‘ജിയോ എയർഫൈബർ’ (JioAirFiber) വഴിയും വിപണിയിൽ ജിയോ മേധാവിത്വം ഉറപ്പിച്ചു കഴിഞ്ഞു. കഴിഞ്ഞ വർഷം തന്നെ ലോകത്തിലെ ഏറ്റവും വലിയ ഫിക്സഡ് വയർലെസ് ബ്രോഡ്ബാൻഡ് ഓപ്പറേറ്ററായി മാറിയ ഈ സേവനം, ഇപ്പോൾ ഇന്ത്യയിലുടനീളമുള്ള 1.3 കോടിയിലധികം വീടുകളിലേക്ക് അതിവേഗ കണക്റ്റിവിറ്റി എത്തിക്കുന്നതായി ആകാശ് അംബാനി പറഞ്ഞു. ഡിജിറ്റൽ സൗകര്യങ്ങൾ കുറവുള്ള ഗ്രാമീണ മേഖലകളിൽ അതിവേഗ ബ്രോഡ്ബാൻഡ് സേവനങ്ങൾ ലഭ്യമാക്കാൻ ഈ പ്ലാറ്റ്ഫോം വലിയ രീതിയിൽ സഹായിക്കുന്നുണ്ട്. ഇതിനൊപ്പം ഭാവിയിലെ സാങ്കേതിക വിദ്യ മുൻനിർത്തി ജിയോ നെറ്റ്‌വർക്കിലേക്ക് നേരിട്ട് ആർട്ടിഫിഷ്യൽ ഇന്റലിജൻസ് വോയ്‌സ് അസിസ്റ്റന്റായ ‘ജിയോ കോൾ ഏജന്റ്’ (Jio Call Agent) സംയോജിപ്പിക്കുമെന്നും, രാജ്യത്തെ വിദൂര കോണുകളിലും മികച്ച കണക്റ്റിവിറ്റി ഉറപ്പാക്കാൻ തദ്ദേശീയമായി നിർമ്മിച്ച ഉപഗ്രഹങ്ങൾ ഉപയോഗിച്ചുള്ള സാറ്റലൈറ്റ് ബ്രോഡ്ബാൻഡ് സംവിധാനം കൊണ്ടുവരുന്നതിനെക്കുറിച്ച് കമ്പനി ആലോചിക്കുന്നുണ്ടെന്നും ആകാശ് അംബാനി കൂട്ടിച്ചേർത്തു.
