ന്യൂഡൽഹി : ഇന്ത്യൻ കരസേനയുടെ പുതിയ മേധാവിയായി ചുമതലയേറ്റ ജനറൽ ധീരജ് സേത്ത് തന്റെ പിതാവും മുൻ സൈനികനുമായ ലെഫ്റ്റനന്റ് ജനറൽ (റിട്ടയേർഡ്) കെ. എം. സേത്തിന് സല്യൂട്ട് നൽകുന്നതിന്റെ ദൃശ്യങ്ങൾ ശ്രദ്ധേയമാകുന്നു. ബുധനാഴ്ച ഡൽഹിയിൽ നടന്ന ഔദ്യോഗിക ചടങ്ങിനിടെയാണ് ഈ ഹൃദ്യമായ നിമിഷം അരങ്ങേറിയത്.
ഇന്ത്യയുടെ 31-ാമത് കരസേനാ മേധാവിയായി ജനറൽ ധീരജ് സേത്ത് ചുമതലയേൽക്കുന്ന ചടങ്ങിൽ ഗാർഡ് ഓഫ് ഓണർ സ്വീകരിച്ചതിന് ശേഷമാണ് അദ്ദേഹം പിതാവിന് മുന്നിലെത്തി സല്യൂട്ട് നൽകുകയും പാദങ്ങളിൽ തൊട്ട് വന്ദിക്കുകയും ചെയ്തത്. ജനറൽ സേത്തിന്റെ ഇളയ സഹോദരനും നാവികസേനയിലെ റിയർ അഡ്മിറലുമായ രവ്‌നിഷ് സേത്ത് പുതിയ കരസേനാ മേധാവിക്ക് സല്യൂട്ട് നൽകുന്നതും ചടങ്ങിലെ മറ്റൊരു മനോഹര കാഴ്ചയായിരുന്നു.
ജനറൽ ഉപേന്ദ്ര ദ്വിവേദി വിരമിച്ചതിനെ തുടർന്നാണ് ജനറൽ ധീരജ് സേത്ത് പുതിയ മേധാവിയായി ചുമതലയേറ്റത്. പുതിയ ചുമതല ഏറ്റെടുത്ത ശേഷം, ഇന്ത്യൻ സൈന്യത്തെ നയിക്കാൻ തന്നിൽ വിശ്വാസമർപ്പിച്ച പ്രധാനമന്ത്രിക്കും പ്രതിരോധ മന്ത്രിക്കും അദ്ദേഹം നന്ദി അറിയിച്ചു.
ജനറൽ ധീരജ് സേത്തിന്റെ പിതാവ് കെ. എം. സേത്ത് മുൻപ് ഛത്തീസ്ഗഢ്, മധ്യപ്രദേശ്, ത്രിപുര എന്നീ സംസ്ഥാനങ്ങളിൽ ഗവർണറായും സേവനമനുഷ്ഠിച്ചിട്ടുണ്ട്. അച്ഛനോടുള്ള ആദരവ് പ്രകടിപ്പിക്കുന്ന ഈ ഹൃദ്യമായ നിമിഷത്തിന്റെ വീഡിയോ വാർത്താ ഏജൻസിയായ എഎൻഐ (ANI) ആണ് സമൂഹമാധ്യമങ്ങളിൽ പങ്കുവെച്ചത്
