ലോകത്തിലെ ഒന്നാമൻ നമ്മുടെ ‘ബട്ടർ ഗാർലിക് നാൻ’; ആഗോള ഫുഡ് റാങ്കിംഗിൽ വൻ നേട്ടവുമായി ഇന്ത്യൻ രുചികൾ

ലോകമെമ്പാടുമുള്ള ഭക്ഷണപ്രേമികൾ ഏറെ ആകാംഷയോടെ കാത്തിരിക്കുന്ന ‘ടേസ്റ്റ്അറ്റ്ലസ് വേൾഡ് ഫുഡ് അവാർഡുകൾ’ പ്രഖ്യാപിച്ചു. ലോകത്തിലെ ഏറ്റവും മികച്ച 100 ഭക്ഷണസംസ്കാരങ്ങളുടെ  ഈ പുതിയ ആഗോള പട്ടികയിൽ ഇന്ത്യ 13-ാം സ്ഥാനം സ്വന്തമാക്കി. 5.9 ലക്ഷത്തിലധികം വരുന്ന ആളുകളുടെ വോട്ടിംഗും റേറ്റിംഗും വിലയിരുത്തി തയ്യാറാക്കിയ പട്ടികയിൽ 5-ൽ 4.43 പോയിന്റ് നേടിയാണ് ഇന്ത്യ ഈ അഭിമാന നേട്ടം കൈവരിച്ചത്.

ഇറ്റാലിയൻ ഭക്ഷണങ്ങളാണ് ലോകത്ത് ഒന്നാമതെത്തിയത്. ഗ്രീസ്, പെറു, പോർച്ചുഗൽ, സ്പെയിൻ എന്നിവയാണ് ആദ്യ അഞ്ച് സ്ഥാനങ്ങളിൽ ഇടംപിടിച്ച മറ്റ് രാജ്യങ്ങൾ. എന്നാൽ ആഗോളതലത്തിൽ തായ്‌ലൻഡ്, ബ്രസീൽ, ദക്ഷിണ കൊറിയ തുടങ്ങിയ പ്രമുഖ രാജ്യങ്ങളെ പിന്നിലാക്കാൻ ഇന്ത്യയ്ക്കായിട്ടുണ്ട്.

ഇന്ത്യൻ വിഭവങ്ങളെ കേവലം ‘എരിവുള്ളവ’  എന്നതിനപ്പുറം, പല ലെയറുകളുള്ള രുചിക്കൂട്ടുകളുടെ ഒരു വലിയ കലവറയായാണ് ലോകം ഇപ്പോൾ വിലയിരുത്തുന്നത്. ടേസ്റ്റ്അറ്റ്ലസ് പട്ടികയിൽ ഏറ്റവും ഉയർന്ന റേറ്റിംഗ് നേടിയ ചില പ്രമുഖ ഇന്ത്യൻ വിഭവങ്ങൾ ഇവയാണ്:

ബട്ടർ ഗാർലിക് നാൻ : ലോകത്തിലെ ഏറ്റവും മികച്ച ഫ്ലാറ്റ് ബ്രെഡുകളുടെ പട്ടികയിൽ ഒന്നാം സ്ഥാനത്താണ് നമ്മടെ സ്വന്തം ബട്ടർ ഗാർലിക് നാൻ.
അമൃത്സരി കുൽച്ച : ലോകത്തിലെ ഏറ്റവും മികച്ച 100 വിഭവങ്ങളുടെ ലിസ്റ്റിൽ 17-ാം റാങ്കോടെ ഇന്ത്യയിൽ നിന്ന് ഏറ്റവും മുന്നിലെത്തിയത് ഈ വിഭവമാണ്.
കേരള പൊറോട്ട : ദക്ഷിണേന്ത്യയുടെ അഭിമാനമായി നമ്മുടെ ലെയർ പൊറോട്ടയും ഉയർന്ന റേറ്റിംഗോടെ പട്ടികയിൽ തിളങ്ങിനിൽക്കുന്നു.
മുർഗ് മഖാനി അഥവാ ബട്ടർ ചിക്കൻ , ഹൈദരാബാദി ബിരിയാണി, ഷാഹി പനീർ എന്നിവയാണ് ലോകശ്രദ്ധ നേടിയ മറ്റ് പ്രധാന വിഭവങ്ങൾ.

ഫുഡ് സിറ്റികളിൽ ‘മുംബൈ’ അഞ്ചാമത്; കോഴിക്കോട് പാരഗണും പട്ടികയിൽ!
രാജ്യങ്ങളുടെ റാങ്കിംഗിന് പുറമെ ലോകത്തിലെ ഏറ്റവും മികച്ച ‘ഫുഡ് സിറ്റികളുടെ’ (Best Food Cities) പട്ടികയിൽ മുംബൈ അഞ്ചാം സ്ഥാനം സ്വന്തമാക്കി ലോകത്തെ ഞെട്ടിച്ചു. വടാപാവ്, പാവ് ഭാജി, ഭേൽപൂരി തുടങ്ങിയ മുംബൈ സ്ട്രീറ്റ് ഫുഡുകളുടെ ജനപ്രീതിയാണ് ഈ നേട്ടത്തിന് കാരണം. അമൃത്സർ, ന്യൂഡൽഹി, ഹൈദരാബാദ് എന്നിവയാണ് പട്ടികയിലെ മറ്റ് ഇന്ത്യൻ നഗരങ്ങൾ.

കൂടാതെ, മലബാറിന്റെ തനത് ബിരിയാണി രുചികൾ കൊണ്ട് പ്രശസ്തമായ കോഴിക്കോട്ടെ ‘പാരഗൺ റസ്റ്റോറന്റ്’  ഇന്ത്യയിലെ ഏറ്റവും മികച്ചതും ഐക്കോണിക്കുമായ ഭക്ഷണശാലകളിൽ ഒന്നായി ടേസ്റ്റ്അറ്റ്ലസ് വീണ്ടും തിരഞ്ഞെടുത്തിട്ടുണ്ട്.

പ്രധാന വിഭവങ്ങൾക്ക് പുറമെ ഇന്ത്യൻ മധുരപലഹാരങ്ങളായ കുൽഫിയും , ഫിർനിയും  ആഗോളതലത്തിൽ മികച്ച റേറ്റിംഗ് നേടിയിട്ടുണ്ട്.