ന്യൂഡൽഹി : വൻ രാഷ്ട്രീയ കൊടുങ്കാറ്റിനാണ് ഇന്ന് ദേശീയ തലസ്ഥാനം സാക്ഷ്യം വഹിച്ചത്. ആം ആദ്മി പാർട്ടിയിൽ (AAP) നിന്ന് പതിനാല് മാസം മുൻപ് രാജിവെച്ച് രൂപീകരിച്ച പ്രാദേശിക കക്ഷിയായ ‘ഇന്ദ്രപ്രസ്ഥ വികാസ് പാർട്ടി’ (IVP) ഭാരതീയ ജനതാ പാർട്ടിയിൽ (BJP) ലയിച്ചു. പാർട്ടിയുടെ മുഴുവൻ ജനപ്രതിനിധികളായ 16 കൗൺസിലർമാരും ഔദ്യോഗികമായി ബിജെപിയിൽ ചേർന്നതോടെ ഡൽഹി കോർപ്പറേഷനിൽ ബിജെപിക്ക് കേവല ഭൂരിപക്ഷം ലഭിച്ചു. ഡൽഹി മുഖ്യമന്ത്രി രേഖാ ഗുപ്ത, ബിജെപി സംസ്ഥാന അധ്യക്ഷൻ ഹർഷ് മൽഹോത്ര എന്നിവരുടെ സാന്നിധ്യത്തിൽ കൊൽക്കത്തയിലും ഡൽഹിയിലുമുള്ള ബിജെപി കേന്ദ്രങ്ങളിലെ ചർച്ചകൾക്ക് ശേഷമാണ് പാർട്ടി ആസ്ഥാനത്ത് വെച്ച് ഈ ലയനം പ്രഖ്യാപിച്ചത്.
ഡൽഹി കോർപ്പറേഷൻ തിരഞ്ഞെടുപ്പ് അടുത്തുനിൽക്കെ ആണ് തലസ്ഥാന നഗരത്തിൽ ഈ വൻ രാഷ്ട്രീയ അട്ടിമറി. വരാനിരിക്കുന്ന കോർപ്പറേഷൻ തിരഞ്ഞെടുപ്പിൽ സീറ്റ് ഉറപ്പാക്കുന്നതിനും ഡൽഹിയുടെ വികസന പ്രക്രിയ വേഗത്തിലാക്കുന്നതിനും വേണ്ടിയാണ് തങ്ങൾ ഈ സുപ്രധാന തീരുമാനമെടുത്തതെന്ന് ഐവിപി നേതാക്കൾ വ്യക്തമാക്കി. കോർപ്പറേഷനിൽ നിലവിൽ കൂറുമാറ്റ നിരോധന നിയമം ബാധകമല്ലാത്തതിനാൽ ഈ കൂട്ടത്തോടെയുള്ള പാർട്ടി മാറ്റം നിയമപരമായ തടസ്സങ്ങളില്ലാതെ പൂർത്തിയായി. കഴിഞ്ഞ വർഷം ഫെബ്രുവരിയിൽ നടന്ന ഡൽഹി നിയമസഭാ തിരഞ്ഞെടുപ്പിൽ ആം ആദ്മി പാർട്ടിക്ക് കനത്ത പരാജയം നേരിട്ടിരുന്നു. ഇതിന് പിന്നാലെ പാർട്ടി നേതൃത്വത്തിന്റെ ഏകപക്ഷീയമായ തീരുമാനങ്ങളിലും വികസന മുരടിപ്പിലും പ്രതിഷേധിച്ച് മുൻ ബിഎംസി ഹൗസ് ലീഡർ മുകേഷ് ഗോയലിന്റെ നേതൃത്വത്തിൽ 15 ഓളം കൗൺസിലർമാർ എഎപി വിട്ട് ഇന്ദ്രപ്രസ്ഥ വികാസ് പാർട്ടി രൂപീകരിക്കുകയായിരുന്നു. പിന്നീട് ഒരു കൗൺസിലർ കൂടി ഇവർക്കൊപ്പം ചേർന്നതോടെ അംഗബലം 16 ആയി ഉയർന്നിരുന്നു.
ഐവിപി പൂർണ്ണമായും ബിജെപിയിൽ ലയിച്ചതോടെ 250 അംഗങ്ങളുള്ള ഡൽഹി കോർപ്പറേഷനിൽ ബിജെപിയുടെ ആകെ കൗൺസിലർമാരുടെ എണ്ണം 139 ആയി ഉയർന്നു. വരാനിരിക്കുന്ന നിർണായകമായ മേയർ, ഡെപ്യൂട്ടി മേയർ തിരഞ്ഞെടുപ്പുകളിലും വിവിധ വാർഡ് കമ്മിറ്റികളുടെ അധ്യക്ഷ പദവികളിലേക്കും ബിജെപിക്ക് ഈ ലയനം വൻ മേൽക്കൈ നൽകും. കോർപ്പറേഷനിലെ ഫണ്ട് വിനിയോഗങ്ങൾക്കും വലിയ പദ്ധതികൾക്കും അനുമതി നൽകുന്ന തന്ത്രപ്രധാനമായ സ്റ്റാൻഡിംഗ് കമ്മിറ്റിയിൽ ഇനി ബിജെപിക്ക് ഏകപക്ഷീയമായ തീരുമാനങ്ങൾ കൈക്കൊള്ളാൻ സാധിക്കും. ഡൽഹിയിൽ കേന്ദ്രത്തിലും സംസ്ഥാനത്തും ഇപ്പോൾ കോർപ്പറേഷനിലും ബിജെപി അധികാരത്തിൽ എത്തുന്നതോടെ ഒരു ‘ട്രിപ്പിൾ എൻജിൻ’ ഭരണമാണ് യാഥാർത്ഥ്യമാകാൻ പോകുന്നതെന്ന് ബിജെപി നേതൃത്വം അവകാശപ്പെട്ടു.
