ന്യൂഡൽഹി : പഞ്ചാബിലെ തൊഴിൽ നിയമന പരീക്ഷകളിലെ ചോദ്യപേപ്പർ ചോർച്ചയിലും തട്ടിപ്പുകളിലും ആം ആദ്മി പാർട്ടിയെയും അരവിന്ദ് കെജ്രിവാളിനെയും ലക്ഷ്യമിട്ട് ബിജെപി ഡൽഹിയിൽ ശക്തമായ പ്രതിഷേധം സംഘടിപ്പിച്ചു. ഡൽഹിയിലെ എഎപി ആസ്ഥാനത്തേക്ക് ബിജെപി പ്രവർത്തകർ നടത്തിയ മാർച്ച് സംഘർഷഭരിതമായി. ജൂലൈ 19-ന് നടന്ന ഫാർമസി ഓഫീസർ റിക്രൂട്ട്‌മെന്റ് പരീക്ഷയിലെ കോപ്പിയടിയും ചോർച്ചയുമായി ബന്ധപ്പെട്ട വിവാദങ്ങളാണ് പ്രതിഷേധത്തിന് ആക്കം കൂട്ടിയത്. അഴിമതിക്ക് കൂട്ടുനിൽക്കുന്ന പഞ്ചാബ് വിദ്യാഭ്യാസ മന്ത്രി ഹർജോത് സിംഗ് ബെയിൻസ് ഉടനടി രാജിവെക്കണമെന്നും, വിഷയത്തിൽ എഎപി ദേശീയ കൺവീനർ അരവിന്ദ് കെജ്രിവാൾ നിലപാട് വ്യക്തമാക്കണമെന്നും ബിജെപി നേതാക്കൾ ആവശ്യപ്പെട്ടു. എഎപി ആസ്ഥാനത്തിന് മുന്നിൽ തടച്ചിലുകൾ തീർത്ത പോലീസ് സന്നാഹങ്ങളെ മറികടക്കാൻ പ്രവർത്തകർ ശ്രമിച്ചതോടെയാണ് സംഘർഷാവസ്ഥ ഉടലെടുത്തത്.
കേന്ദ്രസർക്കാർ നീറ്റ് പരീക്ഷാ അട്ടിമറികൾക്കെതിരെ കർശന നിയമങ്ങൾ കൊണ്ടു വന്നപ്പോൾ, സ്വന്തം പാർട്ടി ഭരണത്തിലുള്ള പഞ്ചാബിലെ തുടർച്ചയായ പേപ്പർ ചോർച്ചകളിൽ കെജ്രിവാളും എഎപിയും ഇരട്ടത്താപ്പ് കാണിക്കുകയാണെന്ന് ബിജെപി എംപി ബാൻസുരി സ്വരാജ് കുറ്റപ്പെടുത്തി. പഞ്ചാബിൽ കഴിഞ്ഞ കുറച്ചുകാലങ്ങളായി അരങ്ങേറുന്ന പരീക്ഷാ ക്രമക്കേടുകൾ ലക്ഷക്കണക്കിന് ഉദ്യോഗാർത്ഥികളുടെ ഭാവിയാണ് തകിടം മറിക്കുന്നതെന്നും ബിജെപി നേതാക്കൾ ചൂണ്ടിക്കാട്ടി. പഞ്ചാബ് വിദ്യാഭ്യാസ മന്ത്രിയുടെ രാജി ആവശ്യപ്പെട്ട് സമരം കൂടുതൽ ശക്തമാക്കുമെന്നും ഡൽഹിയിൽ നിന്ന് പഞ്ചാബിലേക്ക് സമരം വ്യാപിപ്പിക്കുമെന്നും ബിജെപി മുന്നറിയിപ്പ് നൽകി.
