റെയിൽവേ നിർമ്മാണ വിപണന രംഗത്ത് ആഗോളതലത്തിൽ ചരിത്ര നേട്ടം കുറിച്ച് ഇന്ത്യൻ റെയിൽവേ. ബംഗ്ലാദേശ് റെയിൽവേയ്ക്കായി നിർമ്മിച്ച 19 കോച്ചുകളുള്ള ആദ്യത്തെ എൽ.എച്ച്.ബി (LHB) ട്രെയിൻ റേക്ക് പഞ്ചാബിലെ കപൂർത്തല റെയിൽ കോച്ച് ഫാക്ടറി (RCF) വിജയകരമായി പുറത്തിറക്കി. ബംഗ്ലാദേശ് റെയിൽവേയ്ക്ക് ആവശ്യമായ 200 ബ്രോഡ്‌ഗേജ് പാസഞ്ചർ കോച്ചുകൾ നിർമ്മിച്ച് നൽകുന്നതിനായി 2024-ൽ കേന്ദ്ര പൊതുമേഖലാ സ്ഥാപനമായ ‘റൈറ്റ്‌സ്’ (RITES) കരാർ നേടിയെടുത്തിരുന്നു. ഇതിന്റെ ഭാഗമായുള്ള ആദ്യ ഘട്ട നിർമ്മാണമാണ് കപൂർത്തല ആർ.സി.എഫിൽ പൂർത്തിയായത്.
മെച്ചപ്പെട്ട സുരക്ഷ, കുറഞ്ഞ പരിപാലനച്ചെലവ്, ഉയർന്ന വേഗതയിലും പ്രവർത്തനക്ഷമതയിലും സർവീസ് നടത്താനുള്ള ശേഷി എന്നിവയാണ് ഈ അത്യാധുനിക എൽ.എച്ച്.ബി കോച്ചുകളുടെ പ്രധാന സവിശേഷതകൾ. 19 കോച്ചുകൾ അടങ്ങിയ ഈ പൂർണ്ണ സജ്ജമായ ട്രെയിനിൽ 3 എ.സി സ്ലീപ്പർ കോച്ചുകൾ, 3 എ.സി ചെയർ കാറുകൾ, 11 നോൺ-എ.സി ചെയർ കാറുകൾ, 2 പവർ കാറുകൾ എന്നിവയാണ് ഉൾപ്പെടുത്തിയിരിക്കുന്നത്. യാത്രക്കാരുടെ സുഖസൗകര്യങ്ങൾക്കും സുരക്ഷയ്ക്കും പരമാവധി മുൻഗണന നൽകിയാണ് ഇവ രൂപകൽപ്പന ചെയ്തിരിക്കുന്നത്.
സഞ്ചാരികൾക്കായി അഡ്ജസ്റ്റ് ചെയ്യാവുന്ന സുഖപ്രദമായ സീറ്റുകൾ, എ.സി കോച്ചുകളിൽ പ്രത്യേക ഫാനുകൾ, സി.സി.ടി.വി ക്യാമറകൾ, അടിയന്തിര സാഹചര്യങ്ങളിൽ ഉപയോഗിക്കാനുള്ള ആധുനിക അലാറം സിസ്റ്റം എന്നിവ കോച്ചുകളിൽ സജ്ജീകരിച്ചിട്ടുണ്ട്. ഇതിനുപുറമേ കുട്ടികളുമായി യാത്ര ചെയ്യുന്നവർക്കായി പ്രത്യേക ബേബി കെയർ റൂമുകളും പ്രാർത്ഥനാ മുറികളും ക്രമീകരിച്ചിട്ടുണ്ട്. വിദേശ രാജ്യങ്ങളിലേക്കുള്ള റെയിൽവേ ഉൽപ്പാദന വിപണനത്തിൽ ഇന്ത്യയുടെ സ്വാധീനം കൂടുതൽ ശക്തമാക്കുന്നതാണ് കപൂർത്തല ഫാക്ടറിയുടെ ഈ നേട്ടം.
