പിണറായി വിജയനും മകൾ വീണാ വിജയനുമെതിരെ രൂക്ഷമായ സാമ്പത്തിക ക്രമക്കേട് ആരോപണങ്ങളുമായി ബിജെപി നേതാവ് ഷോൺ ജോർജ്ജ്. പിണറായി വിജയന് അല്പമെങ്കിലും ഉളുപ്പുണ്ടെങ്കിൽ പ്രതിപക്ഷ നേതാവ് സ്ഥാനം ഉടൻ രാജിവെക്കണമെന്ന് അദ്ദേഹം ആവശ്യപ്പെട്ടു. പിണറായി വിജയൻ സംസ്ഥാന വൈദ്യുതി മന്ത്രിയായിരുന്ന കാലം മുതൽ തുടങ്ങിയ അഴിമതികളുടെ തുടർച്ചയാണിതെന്നും, ഈ അഴിമതിപ്പണം വെളുപ്പിക്കാനുള്ള മറയായാണ് മകൾ വീണയുടെ കമ്പനികളെ ഉപയോഗിച്ചതെന്നും അദ്ദേഹം ആരോപിച്ചു.
കേസിൽ എൻഫോഴ്സ്മെന്റ് ഡയറക്ടറേറ്റ് ഔദ്യോഗിക പത്രക്കുറിപ്പ് ഇറക്കിയിട്ടുണ്ടെന്നും അന്വേഷണം പൂർണ്ണമായും ശരിയായ ദിശയിലാണ് നീങ്ങുന്നതെന്നും ഷോൺ ജോർജ്ജ് വ്യക്തമാക്കി. പുറത്തുവന്ന സാമ്പത്തിക ഇടപാട് രേഖകൾ തന്റേതല്ലെന്ന് പറയാൻ വീണ ഇതുവരെ തയ്യാറായിട്ടില്ലെന്നും, കമ്പനിക്കെതിരെ ഉയർന്ന ആരോപണങ്ങളിൽ എന്തെങ്കിലും നിയമനടപടി സ്വീകരിക്കാൻ ഇവർ മുന്നോട്ടുവന്നിട്ടുണ്ടോയെന്നും അദ്ദേഹം ചോദിച്ചു. ഇ.ഡിയുമായി തനിക്ക് യാതൊരുവിധ നേരിട്ടുള്ള ബന്ധവുമില്ലെന്നും മാധ്യമ വാർത്തകളിലൂടെയാണ് അന്വേഷണ പുരോഗതി അറിയുന്നതെന്നും അദ്ദേഹം വാർത്താസമ്മേളനത്തിൽ പറഞ്ഞു.
ഗൾഫ് രാജ്യങ്ങളിൽ നിന്ന് അമേരിക്കയിലേക്ക് ഹവാല മാർഗ്ഗത്തിലൂടെ പണം കടത്തിയതിന്റെ നിർണായക വിവരങ്ങൾ പുറത്തുവന്നിട്ടുണ്ടെന്ന് അദ്ദേഹം ചൂണ്ടിക്കാട്ടി. ഇത് വെറുമൊരു സാമ്പത്തിക കുറ്റകൃത്യം മാത്രമല്ലെന്നും മറിച്ച് രാജ്യസുരക്ഷയെ നേരിട്ട് ബാധിക്കുന്ന വിഷയമാണെന്നും, അതിനാൽ സിപിഎം നേതൃത്വം പിണറായി വിജയനെ സ്ഥാനത്തുനിന്ന് മാറ്റാൻ തയ്യാറാകണമെന്നും അദ്ദേഹം ആവശ്യപ്പെട്ടു.
കോഴിക്കോട് കേന്ദ്രീകരിച്ച് മന്ത്രി മുഹമ്മദ് റിയാസുമായി ബന്ധപ്പെട്ട ഒരു ലോബി പ്രവർത്തിക്കുന്നുണ്ടെങ്കിലും നിലവിൽ നടക്കുന്നത് റിയാസിനെതിരായ റെയ്ഡല്ലെന്നും വീണയുടെ പണമിടപാടുകളിലാണ് അന്വേഷണമെന്നും അദ്ദേഹം കൂട്ടിച്ചേർത്തു. യാതൊരു സേവനവും നൽകാതെ മകൾക്ക് കോടികൾ ലഭിച്ചത് മുൻ മുഖ്യമന്ത്രിയായിരുന്ന പിണറായി വിജയനുള്ള കൈക്കൂലിയാണെന്ന സ്വപ്ന സുരേഷിന്റെ വെളിപ്പെടുത്തലുകൾ ശരിവെക്കുന്ന തെളിവുകളാണ് ഇപ്പോൾ പുറത്തുവരുന്നതെന്നും, ഇത് വലിയൊരു അഴിമതിയുടെ ചെറിയൊരു ഭാഗം മാത്രമാണെന്നും ഷോൺ ജോർജ്ജ് ആരോപിച്ചു.
