കാഠ്മണ്ഡു: നേപ്പാൾ-തിബറ്റ് അതിർത്തിയിലുണ്ടായ വിനാശകരമായ പ്രളയത്തിൽ കൈലാസ മാനസസരോവർ തീർത്ഥാടനത്തിന് പോയ ഇഷാ ഫൗണ്ടേഷന്റെ സംഘം അകപ്പെട്ടതായി പ്രമുഖ ആത്മീയ നേതാവ് സദ്ഗുരു ജഗ്ഗി വാസുദേവ്. ദുരന്തത്തിൽ തീർത്ഥാടകരുമായുള്ള ബന്ധം വിച്ഛേദിക്കപ്പെട്ടതോടെ വികാരാധീനനായി പൊട്ടിക്കരഞ്ഞുകൊണ്ടാണ് അദ്ദേഹം സ്ഥിതിഗതികൾ വിവരിച്ചത്. നേപ്പാളിലെ ദുരന്തമുഖത്ത് 288 ഇന്ത്യക്കാരെ ഇനിയും കണ്ടെത്താനായിട്ടില്ലെന്ന ആശങ്ക നിലനിൽക്കുന്നതിനിടെയാണ് ഞെട്ടിക്കുന്ന ഈ വിവരവും പുറത്തുവരുന്നത്.
തിബറ്റിലെ സാഗയിലുള്ള ക്യാമ്പിൽ വെച്ച് അനുയായികളെ അഭിസംബോധന ചെയ്യവേ ശബ്ദമിടറിയും കൈകൾ വിറച്ചും കരഞ്ഞുകൊണ്ടുമാണ് സദ്ഗുരു തന്റെ വേദന പങ്കുവെച്ചത്. പശ്ചാത്തലത്തിൽ അനുയായികളുടെ ആർത്തനാദവും കരച്ചിലും പ്രദേശം മുഴുവൻ വിലാപഭരിതമാക്കി. കൈലാസ യാത്ര പൂർത്തിയാക്കി മടങ്ങുകയായിരുന്ന 80 ഓളം പേരടങ്ങിയ സംഘമാണ് ഗൈറോങ്ങിലെ ഇമിഗ്രേഷൻ കേന്ദ്രത്തിൽ നിൽക്കവേ പെട്ടെന്നുണ്ടായ മിന്നൽപ്രളയത്തിൽ പെട്ടത്.
തീവ്രമായ പ്രളയത്തിൽ ഇമിഗ്രേഷൻ കെട്ടിടവും സമീപ പ്രദേശങ്ങളും പൂർണ്ണമായും ഒലിച്ചുപോയെന്ന് പ്രചരിക്കുന്ന ദൃശ്യങ്ങൾ വ്യക്തമാക്കുന്നു. “നാശത്തിന്റെ വ്യാപ്തി നോക്കുമ്പോൾ സാഹചര്യം വളരെ ഗുരുതരമാണ്. ഭയാനകവും അസാധാരണവുമായ ദുരന്തമാണിത്,” എന്ന് സദ്ഗുരു പറഞ്ഞു. ഗൈറോങ്ങിലേക്ക് നേരിട്ടെത്തി രക്ഷാപ്രവർത്തനങ്ങൾക്ക് നേതൃത്വം നൽകാനും തിരച്ചിൽ നടത്താനും അനുമതി തേടി അദ്ദേഹം ഇന്ത്യൻ, ചൈനീസ് എംബസികൾക്ക് വൈകാരികമായ അഭ്യർത്ഥന നടത്തിയിട്ടുണ്ട്.
റോഡുകളും പാലങ്ങളും തകരുകയും വാർത്താവിനിമയ ബന്ധങ്ങൾ പൂർണ്ണമായും വിച്ഛേദിക്കപ്പെടുകയും ചെയ്തതോടെ രക്ഷാപ്രവർത്തനങ്ങൾക്ക് വലിയ തടസ്സമാണ് നേരിടുന്നത്. മേഖലയിൽ ദുരന്തത്തിൽപ്പെട്ട ഇന്ത്യക്കാരെ കണ്ടെത്താൻ വിദേശകാര്യ മന്ത്രാലയത്തിന്റെ നേതൃത്വത്തിൽ 24 മണിക്കൂറും പ്രവർത്തിക്കുന്ന കൺട്രോൾ റൂം തുറന്ന് കേന്ദ്ര സർക്കാർ പ്രവർത്തനങ്ങൾ ഏകോപിപ്പിക്കുന്നുണ്ട്. എംബസികളുമായും പ്രാദേശിക ഭരണകൂടവുമായും ചേർന്ന് കാണാതായവർക്കായുള്ള തിരച്ചിൽ ഊർജ്ജിതമാക്കിയിരിക്കുകയാണ്.
