പ്രധാനമന്ത്രി നരേന്ദ്ര മോദിയുടെ 76-ാം ജന്മദിനത്തിൽ ഹൃദയംഗമമായ ആശംസകൾ അറിയിച്ച് തമിഴ്‌നാട് മുഖ്യമന്ത്രിയും തമിഴക വെട്രി കഴകം (ടി.വി.കെ) അധ്യക്ഷനുമായ സി. ജോസഫ് വിജയ്. ശക്തവും സമൃദ്ധവുമായ ഭാരതം കെട്ടിപ്പടുക്കുന്നതിനായി പൂർണ്ണ അർപ്പണബോധത്തോടെയാണ് പ്രധാനമന്ത്രി രാജ്യത്തെ നയിക്കുന്നതെന്ന് അദ്ദേഹം തമിഴ്‌നാട് മുഖ്യമന്ത്രിയുടെ ഔദ്യോഗിക സാമൂഹിക മാധ്യമ അക്കൗണ്ടിലൂടെ കുറിച്ചു. പ്രധാനമന്ത്രിക്ക് നല്ല ആരോഗ്യവും ദീർഘായുസ്സും നേരുന്നതായും അദ്ദേഹത്തിന് ദീർഘകാലം രാജ്യത്തെ സേവിക്കാൻ സാധിക്കട്ടെയെന്നും വിജയ് ആശംസിച്ചു.
പ്രധാനമന്ത്രിക്ക് ആശംസകൾ നേർന്നതിനോടൊപ്പം മുൻപ് നരേന്ദ്ര മോദിയുമായി കൂടിക്കാഴ്ച നടത്തിയ ചിത്രവും തമിഴ്‌നാട് മുഖ്യമന്ത്രി പങ്കുവെച്ചിട്ടുണ്ട്. തമിഴ്‌നാട് രാഷ്ട്രീയത്തിൽ അടുത്തിടെ വൻ മാറ്റങ്ങൾ സൃഷ്ടിച്ച് മുഖ്യമന്ത്രി പദവിയിലെത്തിയ വിജയ്, കേന്ദ്ര സർക്കാരുമായി സഹകരിച്ചു പ്രവർത്തിക്കുമെന്ന സൂചന നൽകുന്നതാണ് അദ്ദേഹത്തിന്റെ ഈ സന്ദേശം. മുൻ വർഷങ്ങളിലും സിനിമാ താരമെന്ന നിലയിൽ വിജയ് പ്രധാനമന്ത്രിക്ക് ജന്മദിനാശംസകൾ അറിയിച്ചിരുന്നുവെങ്കിലും മുഖ്യമന്ത്രിയെന്ന നിലയിലുള്ള അദ്ദേഹത്തിന്റെ ആദ്യ ജന്മദിനാശംസയാണിത്.
അതേസമയം തമിഴ്‌നാട്ടിലെ മറ്റ് പ്രമുഖ രാഷ്ട്രീയ നേതാക്കളും പ്രധാനമന്ത്രിക്ക് ആശംസകളുമായി രംഗത്തെത്തിയിട്ടുണ്ട്. മുൻ മുഖ്യമന്ത്രിയും ഡി.എം.കെ അധ്യക്ഷനുമായ എം.കെ. സ്റ്റാലിൻ, എ.ഐ.എ.ഡി.എം.കെ ജനറൽ സെക്രട്ടറി എടപ്പാടി പളനിസാമി, ബി.ജെ.പി നേതാക്കൾ എന്നിവരും പ്രധാനമന്ത്രിക്ക് ആശംസകൾ നേർന്നു. രാജ്യവ്യാപകമായി ബി.ജെ.പി നടപ്പിലാക്കുന്ന വിവിധ സാമൂഹിക സേവന പരിപാടികളോടെയാണ് പ്രധാനമന്ത്രിയുടെ ജന്മദിനം ആഘോഷിക്കുന്നത്.
