തിരുവനന്തപുരം: സിഎംആർഎൽ-എക്‌സാലോജിക് സാമ്പത്തിക ഇടപാടുമായി ബന്ധപ്പെട്ട് കേന്ദ്ര അന്വേഷണ ഏജൻസിയായ എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) നൽകിയ റിപ്പോർട്ടിന്റെ അടിസ്ഥാനത്തിൽ സംസ്ഥാന സർക്കാർ അന്വേഷണ നടപടികളിലേക്ക് കടക്കുന്നതിനിടെ, പാർട്ടി അണികളിലും പൊതുസമൂഹത്തിലും പ്രചരിപ്പിക്കാൻ വിശദീകരണ ലഘുലേഖയുമായി സിപിഎം. എന്നാൽ മുൻ മുഖ്യമന്ത്രി പിണറായി വിജയനും മകൾ വീണ വിജയനും ശക്തമായ പ്രതിരോധം തീർത്ത് തയാറാക്കിയ ഈ രാഷ്ട്രീയ വിശദീകരണത്തിൽ, കേസിലെ മറ്റൊരു പ്രധാന കഥാപാത്രവും സംസ്ഥാന സെക്രട്ടേറിയറ്റ് അംഗവുമായ മുൻ മന്ത്രി പി.എ. മുഹമ്മദ് റിയാസിൻ്റെ പേര് പൂർണ്ണമായും പരാമർശിക്കാത്തത് വലിയ രാഷ്ട്രീയ ചർച്ചകൾക്ക് വഴിവെച്ചിരിക്കുകയാണ്.
സിപിഎം സംസ്ഥാന കമ്മിറ്റി തയ്യാറാക്കി കീഴ്‌ഘടകങ്ങളിലേക്കും പാർട്ടി പ്രവർത്തകരിലേക്കും എത്തിക്കുന്ന ഈ ലഘുലേഖയുടെ പ്രധാന ഉള്ളടക്കം പാർട്ടി മുഖപത്രത്തിൽ ലേഖനമായി പ്രസിദ്ധീകരിച്ചിട്ടുണ്ട്.
മുൻ മുഖ്യമന്ത്രി പിണറായി വിജയനെ രാഷ്ട്രീയമായി തകർക്കാനുള്ള ഗൂഢാലോചനയുടെ ഭാഗമായാണ് ഇ.ഡി റിപ്പോർട്ട് എന്നും, വീണ വിജയന്റെ എക്‌സാലോജിക് കമ്പനി സിഎംആർഎല്ലുമായി നടത്തിയത് നിയമാനുസൃതമായ ബിസിനസ് ഇടപാടുകൾ മാത്രമാണെന്നും ലേഖനം അടിവരയിടുന്നു. കുഞ്ഞാലിക്കുട്ടി, ഉമ്മൻ ചാണ്ടി, വി.കെ.ഇബ്രാഹിംകുഞ്ഞ് തുടങ്ങിയ യുഡിഎഫ് നേതാക്കളുടെ പേരുകൾ പോലും സിഎംആർഎൽ ഡയറിയിൽ ഉണ്ടായിട്ടും, രാഷ്ട്രീയ വൈരാഗ്യം വെച്ച് പിണറായിയെയും വീണയെയും മാത്രം വേട്ടയാടുന്നു എന്നാണ് പാർട്ടി ഉയർത്തുന്ന പ്രധാന പ്രതിരോധ വാദം.
അതേസമയം, ഇ.ഡിയുടെ 25 പേജുള്ള റിപ്പോർട്ടിലും വരാനിരിക്കുന്ന പോലീസിന്റെ വിജിലൻസ് എഫ്.ഐ.ആർ നീക്കത്തിലും മുഹമ്മദ് റിയാസിന്റെ പേര് വ്യക്തമായി പരാമർശിക്കപ്പെട്ടിട്ടുള്ള സാഹചര്യത്തിൽ, പാർട്ടി തയാറാക്കിയ ഔദ്യോഗിക പ്രതിരോധ ലഘുലേഖയിൽ റിയാസിനെ തീർത്തും ഒഴിവാക്കിയത് പാർട്ടി അണികൾക്കിടയിലും ആശ്ചര്യമുണർത്തിയിട്ടുണ്ട്.
റിയാസിനെ മനഃപൂർവം മാറ്റിനിർത്തിയതാണോ അതോ തന്ത്രപരമായ രാഷ്ട്രീയ മൗനമാണോ എന്ന ചോദ്യമാണ് പ്രതിപക്ഷവും രാഷ്ട്രീയ നിരീക്ഷകരും ഇപ്പോൾ ഉയർത്തുന്നത്. സിപിഎമ്മിനുള്ളിലെ ആഭ്യന്തര ചർച്ചകൾക്കും വിഭാഗീയത ആരോപണങ്ങൾക്കും ഈ ലഘുലേഖ വിത്തുപാകിയെന്ന തരത്തിലാണ് പ്രതിപക്ഷ നേതാക്കളുടെയും പ്രതികരണം.
