ഇന്ത്യൻ ടീമിലെ നിസ്വാർഥ മനോഭാവത്തെ പ്രശംസിച്ച് അഭിഷേക് ശർമ്മ. സഞ്ജു സാംസണിന്റെ സമീപനവും ടീമിലെ താരങ്ങൾ പരസ്പരം നൽകുന്ന പിന്തുണയുമാണ് ടീമിന്റെ കരുത്തെന്ന് അഭിഷേക് വ്യക്തമാക്കി. സഞ്ജു ഭായിയുടെ പ്രകടനം ടീമിലെ മറ്റ് താരങ്ങൾക്കും പ്രചോദനമാണെന്നും അദ്ദേഹം പറഞ്ഞു.
“ഞങ്ങൾ ബാറ്റിങ് ആരംഭിച്ചപ്പോൾ സഞ്ജു ഭായി ഓപ്പണിങ് സ്ലോട്ട് വിട്ടുതന്നു, പകരം വൈഭവിന് അവസരം കിട്ടി. ടീമിലെ എല്ലാവരും നിസ്വാർഥ മനോഭാവമുള്ളവരാണെന്ന് നമുക്ക് കാണാൻ കഴിയും. ഇന്ന് ടീം പ്രകടിപ്പിച്ച അന്തരീക്ഷം എല്ലാവർക്കും കാര്യങ്ങൾ എളുപ്പമാക്കുമെന്ന് ഞാൻ കരുതുന്നു. കഴിഞ്ഞ രണ്ട് മത്സരങ്ങളിൽ സഞ്ജു ഭായി കളിച്ച രീതിയും അദ്ദേഹത്തിന്റെ ഇന്നിങ്‌സുകളും അതിന് ഉദാഹരണമാണ്,” അഭിഷേക് ശർമ്മ പറഞ്ഞു.
മൂന്നാം ടി20യിൽ ന്യൂസിലൻഡ് ഉയർത്തിയ വിജയലക്ഷ്യം ഇന്ത്യ വെറും 13.2 ഓവറിൽ മറികടന്നത് മത്സരത്തിലെ ഏറ്റവും ശ്രദ്ധേയമായ പ്രകടനമായി. നാല് വിക്കറ്റ് നഷ്ടത്തിൽ 199 റൺസെടുത്ത ഇന്ത്യ ആറ് വിക്കറ്റിന്റെ തകർപ്പൻ വിജയം സ്വന്തമാക്കി. തുടക്കം മുതൽ ആക്രമണാത്മക ബാറ്റിങ് പുറത്തെടുത്ത ഇന്ത്യൻ താരങ്ങൾ ന്യൂസിലൻഡ് ബൗളർമാർക്ക് മത്സരത്തിൽ തിരിച്ചുവരാനുള്ള അവസരം നൽകിയില്ല.
ഇന്ത്യയുടെ വിജയത്തിൽ അഭിഷേക് ശർമയുടെ വെടിക്കെട്ട് ബാറ്റിങ്ങാണ് പ്രധാനമായത്. വെറും 38 പന്തിൽ ഒമ്പത് ഫോറും 11 സിക്‌സും ഉൾപ്പെടെ 113 റൺസ് നേടിയ അഭിഷേക് ന്യൂസിലൻഡ് ബൗളിങ് നിരയെ തകർത്തു. 297.37 എന്ന അസാധാരണ സ്ട്രൈക്ക് റേറ്റിലാണ് താരം ബാറ്റ് വീശിയത്. ടി20 ക്രിക്കറ്റിലെ തന്റെ ആക്രമണശേഷി ഒരിക്കൽക്കൂടി തെളിയിച്ച അഭിഷേക് ഇന്ത്യൻ വിജയത്തിന്റെ മുഖ്യശിൽപിയായി. വൈഭവ് സൂര്യവംശിയും മികച്ച പ്രകടനവുമായി അഭിഷേകിന് പിന്തുണ നൽകി. 19 പന്തിൽ 45 റൺസാണ് വൈഭവ് നേടിയത്. നാല് ഫോറും നാല് സിക്‌സും അടങ്ങിയ ഇന്നിങ്‌സ് ഇന്ത്യയ്ക്ക് അതിവേഗ തുടക്കം സമ്മാനിച്ചു. ഇരുവരും ചേർന്ന് ന്യൂസിലൻഡ് ബൗളർമാരെ സമ്മർദത്തിലാക്കിയതോടെ വിജയലക്ഷ്യം ഇന്ത്യയ്ക്ക് അനായാസമായി.
സ്ഥിരം ഓപ്പണറായ സഞ്ജു വൈഭവിന് ആത്മവിശ്വാസം കൂട്ടാൻ ആ സ്ഥാനം വിട്ടുകൊടുക്കുകയിരുന്നു. 13 പന്തിൽ 18 റൺസെടുത്തപ്പോൾ ശ്രേയസ് അയ്യർക്ക് 10 പന്തിൽ അഞ്ച് റൺസ് മാത്രമാണ് നേടാനായത്. പിന്നീട് തിലക് വർമ്മയും നമൻ ധീറും പുറത്താകാതെ നിന്ന് ഇന്ത്യയുടെ വിജയം പൂർത്തിയാക്കി. ന്യൂസിലൻഡിനായി കൈൽ ജാമിസൺ രണ്ട് വിക്കറ്റുകൾ വീഴ്ത്തിയെങ്കിലും ഇന്ത്യൻ ബാറ്റിങ് നിരയുടെ ആക്രമണത്തിന് തടയിടാനായില്ല.
