യുകെ (യുണൈറ്റഡ് കിംഗ്ഡം) സൈന്യത്തിനെതിരെ കടുത്ത നടപടിയുമായി ഇറാൻ. ബ്രിട്ടന്റെ റോയൽ നേവിയെയും റോയൽ എയർ ഫോഴ്സിനെയും ഇസ്ലാമിക് റിപ്പബ്ലിക് ഓഫ് ഇറാൻ ‘ഭീകര സംഘടനകളായി’ പ്രഖ്യാപിച്ചു. കൂടാതെ യുകെയുടെ വിദേശ രഹസ്യാന്വേഷണ ഏജൻസിയായ സീക്രട്ട് ഇന്റലിജൻസ് സർവീസിനെ (MI6) ‘ശത്രു സംഘം’ (Hostile Group) ആയും പ്രഖ്യാപിച്ചിട്ടുണ്ട്. ഞായറാഴ്ച (നവംബർ 1) ഇറാൻ വിദേശകാര്യ മന്ത്രാലയമാണ് അന്താരാഷ്ട്ര തലത്തിൽ വൻ നയതന്ത്ര ചലനങ്ങൾ സൃഷ്ടിച്ചേക്കാവുന്ന ഈ നിർണ്ണായക തീരുമാനം അറിയിച്ചത്.
ഇറാന്റെ പരമോന്നത ദേശീയ സുരക്ഷാ കൗൺസിലിന്റെ (Supreme National Security Council) പ്രമേയത്തിന്റെ അടിസ്ഥാനത്തിലാണ് നടപടിയെന്ന് വിദേശകാര്യ മന്ത്രാലയം വ്യക്തമാക്കി. പരമാധികാരത്തോടുള്ള ബഹുമാനവും മറ്റ് രാജ്യങ്ങൾക്കെതിരായ നിയമവിരുദ്ധ നടപടികളുടെ നിരോധനവും ഉൾപ്പെടെയുള്ള ഐക്യരാഷ്ട്രസഭാ ചാർട്ടറിന്റെയും അന്താരാഷ്ട്ര നിയമങ്ങളുടെയും തത്വങ്ങൾക്ക് വിരുദ്ധമായാണ് ബ്രിട്ടീഷ് സർക്കാർ പ്രവർത്തിക്കുന്നതെന്ന് ഇറാൻ ആരോപിച്ചു. കഴിഞ്ഞ ഒരു വർഷമായി ടെഹ്റാനെതിരെ ബ്രിട്ടൻ തുടരുന്ന ശത്രുതാപരമായ നിലപാടുകൾക്കുള്ള നേരിട്ടുള്ള മറുപടിയാണ് ഈ നടപടിയെന്ന് വാർത്താക്കുറിപ്പിൽ പറയുന്നു.
യു.എസ്-ഇസ്രായേൽ സഖ്യം ഇറാന് നേരെ നടത്തുന്ന സൈനിക നീക്കങ്ങൾക്ക് ബ്രിട്ടൻ തങ്ങളുടെ അധീനതയിലുള്ള സൈനിക-ലോജിസ്റ്റിക് താവളങ്ങളും സൗകര്യങ്ങളും വിട്ടുനൽകി സഹായിക്കുന്നു എന്നതാണ് ഇറാന്റെ പ്രധാന ആരോപണം. ഇതിനുപുറമെ, 2026 ജൂലൈ 13-ന് ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സിനെ (IRGC) സ്റ്റേറ്റ് ത്രെറ്റ്സ് ആക്ട് 2026-ന്റെ പരിധിയിൽ ഉൾപ്പെടുത്തി ഭീകരപ്പട്ടികയിലേക്ക് മാറ്റാൻ ബ്രിട്ടീഷ് സർക്കാർ തീരുമാനിച്ചിരുന്നു. ഇതിനുള്ള ശക്തമായ തിരിച്ചടിയായാണ് റോയൽ നേവിക്കും എയർഫോഴ്സിനുമെതിരെ ടെഹ്റാൻ ഇപ്പോൾ ഉപരോധ സമാനമായ വിലക്കുകൾ പ്രഖ്യാപിച്ചിരിക്കുന്നത്. തീരുമാനം നിലവിൽ വന്നതോടെ ഇരുരാജ്യങ്ങളും തമ്മിലുള്ള സൈനിക-നയതന്ത്ര ബന്ധം അതിരൂക്ഷമായ പ്രതിസന്ധിയിലേക്കാണ് വഴിമാറുന്നത്.
