ഇന്ത്യ തദ്ദേശീയമായി വികസിപ്പിച്ചെടുത്ത യുദ്ധവിമാനമായ തേജസിനെ നവീകരിക്കാനൊരുങ്ങി പ്രതിരോധ ഗവേഷണ വികസന വകുപ്പ്.ഒറ്റ എന്‍ജിനുള്ള മള്‍ട്ടി റോള്‍ യുദ്ധവിമാനമായ തേജസിന്റെ ആധുനിക പതിപ്പില്‍ രണ്ട് എഞ്ചിന്‍ ഉണ്ടായിരിക്കും.ഇന്ത്യന്‍ നാവികസേനയ്ക്കു വേണ്ടി തയ്യാറാക്കുന്ന Twin engine deck bsed (TEDB) മോഡലില്‍, ചിറകുകള്‍ മടക്കാനുള്ള സംവിധാനവും ഉണ്ടായിരിക്കും. വിമാനവാഹിനികളില്‍ ഇറങ്ങാനുള്ള സൗകര്യം കണക്കിലെടുത്താണ് ഈ പരിഷ്‌കരണം.
ഇതോടെ ഭാരതത്തിന്റെ വിമാന വാഹിനികളായ വിക്രാന്ത്, വിക്രമാദിത്യ എന്നിവയില്‍ ഇപ്പോള്‍ വിന്യസിച്ചിരിക്കുന്ന MiG 29K യുദ്ധവിമാനങ്ങളുടെ സ്ഥാനം തേജസ് കൈയടക്കും.
ഇന്ത്യന്‍ വ്യോമസേനക്ക് സര്‍വവിധ യുദ്ധരീതികള്‍ക്കും പ്രയോജനപ്പെടുത്താന്‍ സാധിക്കുന്ന വിധത്തിലുള്ള Omni Role Combat Aircraft വിഭാഗത്തില്‍പ്പെട്ട വകഭേദത്തിന്റെ രൂപകല്പനയും അണിയറയില്‍ നടക്കുന്നുണ്ട്. നാവിക വകഭേദത്തിന്റെ പോലെ ഡെക്ക് ലാന്‍ഡിംഗ് സംവിധാനങ്ങള്‍ ആവശ്യമില്ലാത്തതിനാല്‍ ഈ മോഡലുകള്‍ക്ക് ഒരു ടണ്ണോളം ഭാരം കുറവായിരിക്കും.
തേജസിന്റെ ഈ രണ്ടു വകഭേദങ്ങളും വികസിപ്പിച്ചെടുക്കുന്നതിന് മൊത്തത്തില്‍ 13, 800 കോടി രൂപയാണ് ചിലവ് പ്രതീക്ഷിക്കുന്നത്.ഏകദേശം 538 കോടി രൂപയ്ക്ക് നാവികസേനയ്ക്കുള്ള പതിപ്പും, അതിലും കുറഞ്ഞ ചിലവില്‍ വ്യോമസേനയുടെ വകഭേദവും നിര്‍മ്മിക്കാന്‍ കഴിയും.ഗവണ്‍മെന്റ് ഫണ്ട് അനുവദിച്ചാല്‍ ഏതാണ്ട് ആറു വര്‍ഷത്തിനുള്ളില്‍ ആദ്യത്തെ മോഡല്‍ പുറത്തിറക്കാന്‍ കഴിയുമെന്ന് പ്രതിരോധ ഗവേഷണ വൃത്തങ്ങള്‍ വ്യക്തമാക്കി.അമേരിക്കന്‍ നിര്‍മ്മിത F404GEIN20 ടര്‍ബോഫാന്‍ സിംഗിള്‍ എഞ്ചിനാണ് നിലവിലുള്ള തേജസില്‍ ഉപയോഗിക്കുന്നത്.ഈ മോഡലിന്റെ സാങ്കേതിക പരിമിതികള്‍ നിമിത്തം ഇവ വളരെ കുറച്ചെണ്ണം മാത്രമേ നിര്‍മ്മിക്കപ്പെട്ടിട്ടുള്ളൂ.ഇരട്ട എഞ്ചിനുകള്‍ നല്‍കുന്ന കരുത്ത് നവീകരിക്കപ്പെട്ട മോഡലിന് ആകാശങ്ങളിലും സമുദ്രാതിര്‍ത്തിയിലും കൂടുതല്‍ നിയന്ത്രണം നല്‍കും. വലിപ്പത്തില്‍, റഷ്യന്‍ നിര്‍മിത MiG29K യോട് കിടപിടിക്കുന്ന ഈ മോഡലിന് ഒമ്പതു ടണ്‍ പേലോഡ് വഹിക്കാനുള്ള ശേഷിയുണ്ടാകും.
മാക് 1.6 ല്‍, മണിക്കൂറില്‍ 2000 കിലോമീറ്റര്‍ വേഗതയാര്‍ജ്ജിക്കാന്‍ ശേഷിയുള്ള തേജസില്‍ കടലിലെയും കരയിലെയും ആകാശത്തിലെയും ലക്ഷ്യങ്ങളെ ഒരുപോലെ ട്രാക്ക് ചെയ്യാന്‍ കഴിവുള്ള AESA റഡാറുകള്‍, അസ്ത്ര എയര്‍ ടു എയര്‍ മിസൈലുകള്‍, സുരക്ഷിതമായ ആശയവിനിമയത്തിനായി ഇന്ത്യന്‍ ഡാറ്റാലിങ്കുകള്‍ മുതലായ ആധുനിക സംവിധാനങ്ങള്‍ ഘടിപ്പിച്ചിട്ടുണ്ടാകും.
2030-2050 കാലഘട്ടത്തില്‍ ചുരുങ്ങിയത് 750 യുദ്ധവിമാനങ്ങളെങ്കിലും ഉപയോഗത്തില്‍ നിന്നും വിരമിക്കുമെന്ന വസ്തുത വിരല്‍ചൂണ്ടുന്നത് ആ കുറവു നികത്തേണ്ടതിനായി നിര്‍മ്മിക്കപ്പെടേണ്ട മികച്ച യുദ്ധവിമാനങ്ങളുടെ ആവശ്യകതയിലേക്കാണ്. തേജസിന്റെ രണ്ടാമത്തെ പതിപ്പ് ഈ വിടവ് നികത്തുമെന്ന ഉറച്ച വിശ്വാസത്തിലാണ് പ്രതിരോധവകുപ്പ്.
