രാഷ്ട്രത്തിന്റെ പരിപൂർണ ശ്രദ്ധയും കോവിഡ് രോഗബാധയിലേക്ക് തിരിഞ്ഞിരിക്കുന്നതിനാൽ, ഭീകരാക്രമണം ലക്ഷ്യമിട്ട് തീവ്രവാദികൾ ഡൽഹിയിലേക്ക് കടന്നതായി രഹസ്യാന്വേഷണ ഏജൻസികളുടെ റിപ്പോർട്ട്.ജമ്മു കശ്മീരിലെ ഷോപ്പിയാനിൽ നിന്നുമാണ് രണ്ട് തീവ്രവാദികൾ ഡൽഹിയിലേക്ക് കടന്നിരിക്കുന്നതായി റിപ്പോർട്ട് ചെയ്യപ്പെട്ടിട്ടുള്ളത്.ഇസ്ലാമിക് സ്റ്റേറ്റ് പ്രവർത്തകരായ രണ്ടു ഭീകരരും ടെലഗ്രാം വഴിയാണ് ആശയവിനിമയം നടത്തിയിരുന്നത്.
ഇസ്ലാമിക് സ്റ്റേറ്റ് മുഖപത്രങ്ങളായ അൽ നബ, വോയ്സ് ഓഫ് ഹിന്ദ്‌ എന്നിവർ ” സന്ദർഭം ഉപയോഗപ്പെടുത്തുക” എന്ന ആശയത്തിൽ ലേഖനങ്ങൾ പ്രസിദ്ധീകരിച്ചിരുന്നു. ഇന്ത്യയുടെ പരിപൂർണ്ണ ശ്രദ്ധയും ജനങ്ങളെ സുരക്ഷിതമാക്കുന്നതിലേക്കും ചികിത്സയിലേക്കും തിരിഞ്ഞിരിക്കുന്ന ഈ അവസ്ഥയിൽ ഉണ്ടാവുന്ന സുരക്ഷാ പാളിച്ചകൾ മുതലെടുക്കാനാണ് ലേഖനങ്ങൾ ആഹ്വാനം ചെയ്യുന്നത്. സംഭവത്തെ തുടർന്ന് ഡൽഹിയിൽ സുരക്ഷ ശക്തമാക്കിയിട്ടുണ്ട്. കഴിഞ്ഞ ആഴ്ച അഫ്ഗാനിസ്ഥാനിലെ ഗുരുദ്വാരയിൽ, ഇസ്ലാമിക് സ്റ്റേറ്റ് ഭീകരാക്രമണം നടത്തിയിരുന്നു. തീവ്രവാദികളിൽ ഒരാളായ മുഹമ്മദ് സാജിദ് കേരളത്തിലെ കാസർകോട് സ്വദേശിയാണ്.
