ഡൽഹി: വരുന്ന 3 ദിവസത്തിനുള്ളിൽ സംസ്ഥാനങ്ങൾക്ക് 51 ലക്ഷം ഡോസ് വാക്സിൻ കൂടി വിതരണം ചെയ്യുമെന്ന് കേന്ദ്ര ആരോഗ്യ മന്ത്രാലയം. രാജ്യത്തെ വിവിധ സംസ്ഥാനങ്ങളിലും കേന്ദ്ര ഭരണപ്രദേശങ്ങളിലുമായി 1.84 കോടി കോവിഡ് വാക്‌സിന്‍ ഡോസുകള്‍ നിലവില്‍ സ്റ്റോക്കുണ്ടെന്നും ആരോഗ്യ മന്ത്രാലയം അറിയിച്ചു.
വിവിധ സംസ്ഥാനങ്ങള്‍ക്കും കേന്ദ്ര ഭരണപ്രദേശങ്ങള്‍ക്കുമായി ഇതുവരെ സൗജന്യമായി നൽകിയത് 20 കോടിയിലധികം വാക്സിൻ ഡോസുകളാണെന്നും ആരോഗ്യ മന്ത്രാലയം വ്യക്തമാക്കി. കേന്ദ്ര ആരോഗ്യ മന്ത്രാലയത്തിന്റെ കണക്ക് പ്രകാരം രാജ്യത്ത് ഇതുവരെ 18,43,67,772 ഡോസ് വാക്സിനുകൾ വിതരണം ചെയ്തു.
അതേസമയം ജനിതകമാറ്റം വന്ന കൊറോണ വൈറസിനെതിരെ ഇന്ത്യയുടെ കൊവാക്സിൻ ഫലപ്രദമെന്ന് പഠന റിപ്പോർട്ട് പുറത്ത് വന്നു. ഇന്ത്യയിലും യുകെയിലും രണ്ടാം തരംഗ വ്യാപനത്തിന് കാരണമായ കൊറോണ വൈറസിന്റെ ബി.1.617, ബി.1.1.7 എന്നീ വകഭേദങ്ങൾക്കെതിരെയും ഭാരത് ബയോടെകിന്റെ കൊവാക്സിൻ ഫലപ്രദമാണ് എന്നാണ് റിപ്പോർട്ട്. ദേശീയ വൈറോളജി ഇൻസ്റ്റിറ്റ്യൂട്ട് ഐ സി എം ആറുമായി ചേർന്ന് നടത്തിയ പഠനത്തിലാണ് ഇക്കാര്യം വ്യക്തമാകുന്നത് എന്ന് ഭാരത് ബയോടെക് വ്യക്തമാക്കി.
