ഷവോമിയുടെ സബ് ബ്രാൻഡായ റെഡ്മി ഇന്ത്യയിൽ ആദ്യമായി 5ജി പിന്തുണയുള്ള ഫോൺ ലോഞ്ച് ചെയ്യാനൊരുങ്ങുകയാണ്. റെഡ്മി നോട്ട് 10 സീരീസിലേക്ക് എത്തുന്ന ഫോണിന്റെ പേര് ‘റെഡ്മി നോട്ട് 10ടി 5ജി’ എന്നാണ്. ജൂലൈ 20ന് വെർച്വൽ ഇവൻറിലൂടെയായിരിക്കും 10ടി 5ജി അവതരിപ്പിക്കുക.
ആഗോള മാർക്കറ്റിൽ നേരത്തെ ലോഞ്ച് ചെയ്ത റെഡ്മി നോട്ട് 10 5ജിയുടെ റീബ്രാൻഡഡ് വേർഷനായിരിക്കും നോട്ട് 10ടി 5ജി. 6.5 ഇഞ്ച് വലിപ്പമുള്ള ഫുൾ എച്ച്. ഡി ഡിസ്പ്ലേയാണ് 10ടി-ക്ക്. 90Hz റിഫ്രഷ് റേറ്റുമുണ്ടായിരിക്കും. 2400 x 1080 പിക്സൽ റെസൊല്യൂഷനുള്ള ഡിസ്പ്ലേയുടെ പീക് ബ്രൈറ്റ്നസ് 500 നിറ്റ്സ് ആയിരിക്കും. മീഡിയടെകിന്റെ 5ജി പിന്തുണയുള്ള ഡൈമൻസിറ്റി 700 എന്ന ചിപ്സെറ്റായിരിക്കും ഫോണിന് കരുത്ത് പകരുക. 8ജിബി വരെ റാമും 256 ജിബി വരെ സ്റ്റോറേജും ഫോണിനുണ്ടായിരിക്കും.
48MP പ്രൈമറി ലെൻസ്, 2MP വീതമുള്ള ഡെപ്ത് സെൻസർ, മാക്രോ ലെൻസ് എന്നിങ്ങനെ ട്രിപ്പിൾ കാമറ സെറ്റപ്പാണ് പിറകിൽ കൊടുത്തിരിക്കുന്നത്. മുന്നിൽ പഞ്ച്ഹോൾ കട്ടൗട്ടിൽ 8MP ഉള്ള സെൽഫീ കാമറയുമുണ്ട്. 5,000mAh ബാറ്ററിയുള്ള ഫോണിനൊപ്പം 18W ഫാസ്റ്റ് ചാർജറാണുണ്ടാവുക. യു.എസ്.ബി ടൈപ് സി പോർട്ട്, 3.5 എംഎം ഓഡിയോ ജാക്ക് എന്നിവ ഫോണിലുണ്ടാവും. ആൻഡ്രോയ്ഡ് 11നെ അടിസ്ഥാനമാക്കിയുള്ള MIUI 12.5-ൽ ആയിരിക്കും നോട്ട് 10ടി 5ജി പ്രവർത്തിക്കുക.
ചൈനയിൽ റെഡ്മി നോട്ട് 10 5ജിക്ക് 1,099 ചൈനീസ് യുവാനായിരുന്നു വില, അത് ഇന്ത്യൻ രൂപയിലാക്കുമ്പോൾ 12,500 വരും. നിലവിൽ നോട്ട് 10ടിയുടെ വില കമ്പനി പുറത്തുവിട്ടിട്ടില്ലെങ്കിലും 15000ത്തിന് താഴെയാണ് പ്രതീക്ഷിക്കുന്നത്.
