കോഴിക്കോട്: ന്യൂനപക്ഷങ്ങളെ കൂടെ നിർത്താൻ നിര്‍ത്താന്‍ പുതിയ പദ്ധതിയുമായി സിപിഎം. കെ.ടി. ജലീലിനാണ് പുതിയ ചുമതല. മുസ്ലിം ലീഗില്‍നിന്നും കോണ്‍ഗ്രസില്‍നിന്നും വിഘടിച്ചു നില്‍ക്കുന്നവരെയും അസംതൃപ്തരെയും പാര്‍ട്ടി പ്ലാറ്റ്ഫോമിലെത്തിക്കുന്നതിന് ജലീലിന്റെ നേതൃത്വത്തിൽ ‘മുഖ്യധാര റീഡേഴ്സ് ഫോറം’ എന്ന പേരില്‍ വേദി രൂപവത്കരിച്ച്‌ പ്രവര്‍ത്തിക്കാനാണ് സി.പി.എം നേതൃത്വം പദ്ധതിയിട്ടിരിക്കുന്നത്.
2012ല്‍ പാര്‍ട്ടിയുടെ ആശിര്‍വാദത്തോടെ ജലീലിന്റെ പത്രാധിപത്യത്തില്‍ മുഖ്യധാര ത്രൈ മാസിക പ്രസിദ്ധീകരണം ആരംഭിച്ചിരുന്നു. അന്നത്തെ സി.പി.എം സംസ്ഥാന സെക്രട്ടറി പിണറായി വിജയനാണ് പ്രകാശനം നിര്‍വഹിച്ചത്. എന്നാല്‍, ജലീല്‍ മന്ത്രിയായതോടെ പ്രസിദ്ധീകരണം മുടങ്ങി. ഇപ്പോള്‍ പുനരാരംഭിച്ച്‌ അതിന്റെ പേരില്‍ റീഡേഴ്സ് ഫോറം രുപവല്‍ക്കരിക്കാനാണ് പാര്‍ട്ടി തീരുമാനം. ഇത് സംബന്ധിച്ച്‌ സംസ്ഥാന കമ്മിറ്റി കീഴ്ഘടകങ്ങള്‍ക്ക് സര്‍ക്കുലര്‍ അയച്ചതായി അറിയുന്നു.
ഇതിന്റെ അടിസ്ഥാനത്തില്‍ റീഡേഴ്സ് ഫോറത്തിന് സംസ്ഥാന, ജില്ല, മണ്ഡലം, പഞ്ചായത്ത് തലങ്ങളില്‍ വരെ കമ്മറ്റികള്‍ രൂപവത്കരിക്കും. സാമൂഹ്യ സാംസ്കാരിക രംഗത്ത് സജീവ സാന്നിധ്യമാക്കി ഉയര്‍ത്തിക്കൊണ്ടുവരാനും ന്യൂനപക്ഷ വിഭാഗങ്ങളില്‍ പാര്‍ട്ടിക്ക് സ്വീകാര്യത വര്‍ധിപ്പിക്കാനുമാണ് ഇതിലൂടെ സിപിഎം ലക്ഷ്യമിടുന്നത്. അതോടൊപ്പം ലീഗിലേയും കോണ്‍ഗ്രസിലെയും വിഘടിച്ചു നില്‍ക്കുന്നവരെ ഭാരവാഹിത്വം നല്‍കി ഫോറത്തിന്റെ നേതൃത്വത്തിലേക്ക് കൊണ്ട് വരാനും പരിപാടിയുണ്ടെന്ന് അറിയുന്നു. മതവിശ്വാസികള്‍ക്കിടയിലേക്ക് നേരിട്ട് കടന്നു ചെല്ലാനുള്ള വേദിയായും ഫോറത്തെ ഉപയോഗപ്പെടുത്തും.
മുഖ്യധാര റീഡേഴ്സ് ഫോറം രൂപവത്കരണത്തെ കുറിച്ച്‌ ചോദിച്ചപ്പോള്‍ ഇത് സംബന്ധിച്ച്‌ പാര്‍ട്ടിയില്‍ നിന്ന് ഔദ്യോഗിക അറിയിപ്പൊന്നും ലഭിച്ചിട്ടില്ലെന്നാണ് ജലീല്‍ പ്രതികരിച്ചത്. അറിയിപ്പ് ലഭിക്കുന്ന മുറക്ക് സന്തോഷത്തോടെ ഉത്തരവാദിത്വം ഏറ്റെടുക്കും. ജനപ്രതിനിധികളായ പി.ടി.എ റഹീം, വി. അബ്ദുറഹിമാന്‍, പി.വി. അന്‍വര്‍ തുടങ്ങിയവരുടെയൊക്കെ സേവനം റീഡേഴ്സ് ഫോറത്തിന്റെ സംഘാടനത്തിനും പ്രചാരണത്തിനും ഉപയോഗപ്പെടുത്തുമെന്നും ജലീല്‍ പറഞ്ഞു.
