ഉക്രെയ്നിൽ റഷ്യ ആക്രമണം ശക്തമാക്കുമ്പോൾ പ്രതിദിനം ലക്ഷക്കണക്കിന് ആളുകളാണ് വിവിധ യൂറോപ്യൻ രാജ്യങ്ങളിലേക്ക് പലായനം ചെയ്യുന്നത്. ഈ സാഹചര്യത്തിൽ അഭയാർത്ഥികൾക്ക് തണലൊരുക്കുകയാണ് യൂറോപ്പിൽ എമ്പാടുമുള്ള ക്ഷേത്രങ്ങളും ഹൈന്ദവ സംഘടനകളും. ആർട്ട് ഓഫ് ലിവിംഗ്, സ്വാമിനാരായൺ സൻസ്ഥ, സേവാ ഇന്റർനാഷണൽ, ഇസ്കോൺ തുടങ്ങിയ സംഘടനകളാണ് സേവനത്തിൽ മുൻപന്തിയിൽ.
ഹംഗറി, പോളണ്ട്, റുമേനിയ, സ്ലൊവാക്യ, ഉക്രെയ്ൻ, ബൾഗേറിയ, ജർമ്മനി എന്നിവിടങ്ങളിലെ ആർട്ട് ഓഫ് ലിവിംഗ് കേന്ദ്രങ്ങൾ ഇന്ത്യൻ വിദ്യാർത്ഥികൾക്കും അഭയാർത്ഥികൾക്കും താമസവും ഭക്ഷണവും നൽകുന്നു. ഹംഗറിയിൽ 150 പേർക്ക് താമസിക്കാവുന്ന ക്യാമ്പുകൾ ആർട്ട് ഓഫ് ലിവിംഗ് സജ്ജീകരിച്ചിട്ടുണ്ട്. പോളണ്ടിൽ 500 കിടക്കകളുള്ള സംവിധാനവും ഒരുക്കിയിട്ടുണ്ട്.
പ്രധാനമന്ത്രി നരേന്ദ്ര മോദിയുടെ നേരിട്ടുള്ള അഭ്യർത്ഥനയെ തുടർന്ന് സേവന രംഗത്ത് വന്ന ഹൈന്ദവ സന്നദ്ധ സംഘടനയാണ് സ്വാമിനാരായൺ സൻസ്ഥ. പോളണ്ട്, റുമേനിയ, ഹംഗറി, ഉക്രെയ്ൻ അതിർത്തികൾ എന്നിവിടങ്ങളിലാണ് ഇവർ സേവനം തുടരുന്നത്. കൂടാതെ സേവാ ഇന്റർനാഷണൽ, ഇസ്കോൺ തുടങ്ങിയ സംഘടനകളും സേവനപാതയിൽ സജീവ സാന്നിദ്ധ്യമായി മുന്നിലുണ്ട്.
