ദുബായ്: ഇന്ത്യൻ ബാറ്റ്സ്മാൻ സൂര്യകുമാർ യാദവിന് ഐസിസിയുടെ 2022ലെ ക്രിക്കറ്റർ ഓഫ് ദി ഇയർ പുരസ്കാരം. കഴിഞ്ഞ വർഷം വിവിധ ടൂർണമെന്റുകളിൽ നടത്തിയ തകർപ്പൻ പ്രകടനങ്ങൾ പരിഗണിച്ചാണ് പുരസ്കാരം. ഒരു കലണ്ടർ വർഷം ട്വന്റി 20യിൽ 1000ന് മുകളിൽ റൺസ് സ്കോർ ചെയ്യുന്ന ആദ്യ ഇന്ത്യൻ താരം എന്ന റെക്കോർഡ് സൂര്യകുമാർ യാദവ് സ്വന്തമാക്കിയിരുന്നു.
ഐസിസി ട്വന്റി 20 ബാറ്റ്സ്മാന്മാരുടെ റാങ്കിംഗിൽ പാകിസ്താന്റെ മുഹമ്മദ് റിസ്വാനെ പിന്തള്ളി സൂര്യകുമാർ യാദവ് കഴിഞ്ഞ വർഷം ഒന്നാം സ്ഥാനത്ത് എത്തിയിരുന്നു. 46.56 ശരാശരിയിൽ 31 ടി20 മത്സരങ്ങളിൽ നിന്നും സൂര്യകുമാർ കഴിഞ്ഞ വർഷം 1,164 റൺസ് സ്കോർ ചെയ്തിരുന്നു. കഴിഞ്ഞ വർഷം ട്വന്റി 20 മത്സരങ്ങളിൽ നിന്നും ആകെ 68 സിക്സുകൾ നേടി സൂര്യകുമാർ പുതിയ റെക്കോർഡും സ്ഥാപിച്ചിരുന്നു.
ബഹുമതിക്ക് അർഹനായതിൽ സന്തോഷമുണ്ടെന്ന് സൂര്യകുമാർ യാദവ് പ്രതികരിച്ചു. വരും വർഷങ്ങളിലും മികച്ച പ്രകടനം പുറത്തെടുക്കാൻ പരിശീലനം തുടരുകയാണെന്നും സൂര്യകുമാർ പറഞ്ഞു.
