മലയാളികളുടെ ആഹാര ശീലത്തിൽ പഴങ്ങൾക്കുള്ള സ്ഥാനം വലുതാണ്. അതിൽ മുൻപന്തിയിലാണ് വാഴപ്പഴം. നമ്മളിൽ ചിലരുടെയെങ്കിലും വാഴയുണ്ടാകും. എന്നാൽ ഭൂരിഭാഗം ആളുകൾക്കു ഇതിലുണ്ടാകുന്ന കുല എങ്ങനെ പഴുപ്പിക്കണം എന്നതിനെക്കുറിച്ച് വലിയ ധാരണയില്ല. ശരിയായ രീതിയിൽ പഴുപ്പിച്ചെടുത്താൻ വലിയ രുചിയാണ് വാഴപ്പഴത്തിന് ഉണ്ടാകുക.
കടയിൽ നിന്നും നാം വാങ്ങുന്ന പഴം കൃത്രിമമായി പഴുപ്പിച്ച് എടുത്തവയായിരിക്കും. ഇത് വലിയ ആരോഗ്യപ്രശ്‌നങ്ങളാണ് ഉണ്ടാക്കുക. വാഴക്കുല പഴുപ്പിക്കാൻ നിരവധി മാർഗ്ഗങ്ങളാണ് ഉള്ളത്. പുകയിടൽ ആണ് പരമ്പരാഗതമായി സ്വീകരിക്കുന്ന രീതി.
പണ്ട് കാലങ്ങളിൽ വാഴക്കുല പഴുപ്പിക്കാൻ അടുപ്പിന്റെ ഭാഗത്തായി വയ്ക്കാറുണ്ട്. അടുപ്പിന് താഴെയുള്ള വിറകുവയ്ക്കുന്ന സ്ഥലത്ത് വയ്ക്കുകയോ, മുകളിലായി കെട്ടിത്തൂക്കുകയോ ആണ് രീതി. എന്നാൽ ഇന്ന് അടുപ്പുകൾ ഉള്ള വീടുകൾ കുറവാണ്. അതിനാൽ മറ്റ് പുകയിടൽ രീതിയാണ് അവലംബിക്കുന്നത്.
കലത്തിലേക്ക് കായ ഇറക്കിവച്ച് വശങ്ങളിൽ കനൽ ഇട്ട് പുകയ്ച്ച് വാഴക്കുല പഴുപ്പിക്കാം. പുകയ്ക്കാനായി വറ്റൽ മുളക് ഉപയോഗിക്കാം. പുകഞ്ഞ് വരുമ്പോൾ തുണിവെച്ച് മൂടുക. ശേഷം കട്ടിയുള്ള പാത്രം അതിന് മുകളിലായി വയ്ക്കുക. രണ്ട് ദിവസത്തിനുള്ളിൽ പഴുക്കും.
വലിയ ട്രമ്മിൽ കുല ഇറക്കിവച്ച ശേഷം ചകിരി കത്തിച്ച് അതിന്റെ വശങ്ങളിൽ വയ്ക്കുക. ശേഷം ട്രം അടച്ചുവയ്ക്കുക. പുകയടിച്ച് അടുത്ത ദിവസം തന്നെ വാഴക്കുല പഴുക്കുന്നതായി കാണാം. ചന്ദനത്തിരി ഉപയോഗിച്ച് പുകയ്ച്ചും വാഴക്കുല പഴുപ്പിക്കാം. പാത്രത്തിൽ പഴം ഇറക്കിവച്ച ശേഷം വശങ്ങളിൽ ചന്ദനത്തിരി കത്തിച്ച് വയ്ക്കുക. ശേഷം അടച്ചുവയ്ക്കുക. വേഗം തന്നെ വാഴക്കുല പഴുക്കും. അതേസമയം ചന്ദനത്തിരി കത്തിച്ച് പുകയ്ക്കുന്നത് നല്ലതല്ലെന്നും പറയപ്പെടുന്നുണ്ട്. പേപ്പർ കത്തിച്ച് വാഴക്കുലയ്ക്ക് മുകളിലിട്ട് പുകയ്ച്ചും പഴം പഴുപ്പിക്കാം.
ചാക്കിൽകെട്ടിവച്ച് ചൂട് തട്ടിച്ചും വാഴക്കുല പഴുപ്പിക്കാവുന്നതാണ്. ചിലയിടങ്ങളിൽ വൈക്കോൽ കൊണ്ട് പൊതിഞ്ഞും, കാർഡ്‌ബോർഡിൽ ഇറക്കിവച്ചും വാഴക്കുല പഴുപ്പിക്കാറുണ്ട്.
