പൊണ്ണത്തടിയും അമിതവണ്ണവും ഗുരുതരമായ ആരോഗ്യപ്രശ്‌നങ്ങള്‍ക്ക് വഴിവെക്കുമെന്ന് തിരിച്ചറിഞ്ഞ് കൃത്യമായ ഡയറ്റ് പിന്തുടരുന്നവര്‍ ഇക്കാലത്ത് അനവധിയാണ്. ആരോഗ്യദായകമായ ഭക്ഷണം, വ്യായാമം, ആവശ്യത്തിനുള്ള ശരീരഭാരം എന്നിവ ആരോഗ്യസംരക്ഷണത്തില്‍ വളരെ പ്രാധാനമാണ്. ഇതിനുവേണ്ടി പലവിധത്തിലുള്ള ഡയറ്റ് രീതികള്‍ തിരഞ്ഞെടുക്കുന്നവരുണ്ട്. അതിലൊന്നാണ് ശരീരഭാരം കുറയ്ക്കുന്നതിന് അടുത്തകാലത്തായി ഏറെപ്പേരെ ആകര്‍ഷിച്ച ഇന്റെർമിറ്റന്റ് ഫാസ്റ്റിംഗ്.
ദിവസേന കുറച്ച് മണിക്കൂറുകള്‍ ഉപവാസം അനുഷ്ഠിക്കുന്ന രീതിയാണിത്. നിശ്ചിത സമയത്ത് ഭക്ഷണവും ബാക്കിയുള്ള സമയം ഉപവാസവും. ഇന്റെര്‍മിറ്റന്റ് ഫാസ്റ്റിംഗിലൂടെ ശരീരഭാരം കുറച്ചവര്‍ ഏറെയാണ്. എന്നാല്‍ ശരീരഭാരം കുറയ്ക്കാന്‍ ആഗ്രഹിക്കുന്ന എല്ലാവര്‍ക്കും യോജിച്ച ഡയറ്റ് രീതി അല്ല ഇതെന്ന് പറയുകയാണ് ന്യൂട്രീഷനിസ്റ്റായ ഡോ. വിശാഖ. ഒരു ഡോക്ടറുടെ ഉപദേശം തേടാതെ ഒരിക്കലും ഇന്റര്‍മിറ്റന്റ് ഫാസ്റ്റിംഗ് എടുക്കരുതെന്നാണ് ഡോ.വിശാഖ പറയുന്നത്. ഈ ഡയറ്റ് രീതി പിന്തുടര്‍ന്നതിന്റെ ഫലമായി ആരോഗ്യപ്രശ്‌നങ്ങള്‍ ഉണ്ടായ അനുഭവങ്ങള്‍ നേരില്‍ അറിയുന്നതിന്റെ അടിസ്ഥാനത്തിലാണ് ഡോ. ഇത് സംബന്ധിച്ച് ചില അറിവുകള്‍ ഇന്‍സ്റ്റഗ്രാമില്‍ പോസ്റ്റ് ചെയ്തത്.
ഒരു വ്യക്തിയുടെ ആരോഗ്യ ചരിത്രം നോക്കിയിട്ട് മാത്രമേ താന്‍ ഇന്റെര്‍മിറ്റന്റ് ഫാസ്റ്റിംഗ് നിര്‍ദ്ദേശിക്കാറുള്ളൂ എന്ന് ഡോക്ടര്‍ പറയുന്നു. രക്തത്തില്‍ പഞ്ചസാരയുടെ അളവ് കുറവുള്ളവര്‍ക്ക് ഈ ഡയറ്റ് രീതി യോജിച്ചതല്ല. കാരണം അങ്ങവെയുള്ളവര്‍ ഈ ഡയറ്റ് പിന്തുടര്‍ന്നാല്‍ രക്തത്തിലെ പഞ്ചസാരയുടെ അളവ് വീണ്ടും കുറയാനും അവര്‍ മോഹാലസ്യപ്പെട്ട് വീഴാനും സാധ്യതയുണ്ട്. അങ്ങനെ സംഭവിച്ചാല്‍ അഡ്രിനാലിന്‍ ഗ്രന്ഥി സ്‌ട്രെസ്സ് ഹോര്‍മോണ്‍ ആയ കോര്‍ട്ടിസോള്‍ കൂടുതലായി ഉല്‍പ്പാദിപ്പിക്കും. ഇത് തൈറോയിഡിന്റെ പ്രവര്‍ത്തനത്തെ ബാധിക്കുകയും അതുവഴി ഓട്ടോഇമ്മ്യൂണ്‍ രോഗമായ ഹഷിമോട്ടോസ് രോഗസാധ്യത ഉണ്ടാകുകയും ചെയ്യുന്നു.
ഇന്റെര്‍മിറ്റന്റ് ഫാസ്റ്റിംഗ് ആരോഗ്യം മെച്ചപ്പെടുത്താനും ഹോര്‍മോണ്‍ സന്തുലിതാവസ്ഥ നിലനിര്‍ത്താനും ഫലപ്രദമാണെന്ന് തെളിയിക്കപ്പെട്ടിട്ടുണ്ട്. പക്ഷേ ശരിയായ രീതിയില്‍ ചെയ്യണമെന്ന് മാത്രം. എന്നാലിവിടെ ശരിയായ രീതിയെന്നത് ആപേക്ഷികമാണ്. രണ്ട് വ്യക്തികള്‍ ശാരീരിക സവിശേഷതകളില്‍ തീര്‍ത്തും വ്യത്യസ്തരായിരിക്കും. അവരുടെ ജീനുകളും സൂക്ഷ്മാണു വ്യവസ്ഥയും ഉപാപചയവുമെല്ലാം വ്യത്യസ്തമാണ്. അതുകൊണ്ട് ഒരാള്‍ക്ക് ഒരു ഡയറ്റിംഗ് രീതി കൊണ്ട് ഗുണമുണ്ടായെന്ന് കേട്ടാല്‍ നാളെ മുതല്‍ താനും അതെടുക്കുകയാണെന്ന് തീരുമാനിക്കാതെ ഒരു ആരോഗ്യവിദഗ്ധന്റെ അഭിപ്രായം തേടുക.
പ്രമേഹം, ഹൈപ്പോതൈറോയിഡിസം, പിസിഒഎസ് എന്നീ ആരോഗ്യപ്രശ്‌നങ്ങള്‍ നേരിടുന്നവര്‍ തങ്ങള്‍ക്ക് ഏത് രീതിയില്‍ ഈ ഫാസ്റ്റിംഗ് എടുക്കാമെന്ന് ആരോഗ്യവിദഗ്ധരോട് ചോദിച്ചറിയുക. ഹൈപ്പോഗ്ലൈസീമിയ അഥവാ രക്തത്തില്‍ പഞ്ചസാരയുടെ അളവ് കുറവുള്ളവര്‍ ഈ ഫാസ്റ്റിംഗ് എടുക്കാത്തതാണ് നല്ലത്.
