എറണാകുളം: നെടുമ്പാശ്ശേരി വിമാനത്താവളത്തിൽ സ്വർണ വേട്ട. രണ്ട് യാത്രികരിൽ നിന്നായി ഒരു കോടിയിലധികം രൂപയുടെ സ്വർണം പിടിച്ചെടുത്തു. രാവിലെയായിരുന്നു സംഭവം.
മലപ്പുറം സ്വദേശി മുഹമ്മദ് യാസിൻ, ഫസൽ എന്നിവരാണ് സ്വർണവുമായി പിടിയിലായത്. മിശ്രിത രൂപത്തിലാക്കിയ സ്വർണം ക്യാപ്‌സൂളാക്കി മലദ്വാരത്തിൽ ഒളിപ്പിച്ചായിരുന്നു ഇരുവരും കടത്താൻ ശ്രമിച്ചത്. എന്നാൽ ഇവരെ സുരക്ഷാ പരിശോധനയ്ക്കിടെ കസ്റ്റംസ് പിടികൂടുകയായിരുന്നു. സംശയം തോന്നിയതിനെ തുടർന്ന് നടത്തിയ ദേഹ പരിശോധനയിലാണ് സ്വർണക്കടത്ത് വ്യക്തമായത്.
ജിദ്ദയിൽ നിന്നാണ് മുഹമ്മദ് യാസിൻ എത്തിയത്. ഇയാളുടെ പക്കൽ നിന്നും 1096 ഗ്രാം സ്വർണം പിടികൂടി. ദുബായിൽ നിന്നും
1152 ഗ്രാം സ്വർണവുമായാണ് ഫസൽ എത്തിയത്. ഇരുവരുടെയും പക്കൽ നിന്നും നാല് ക്യാപ്‌സ്യൂളുകൾ വീതമാണ് പിടിച്ചെടുത്തത്. സംഭവത്തിൽ വിശദമായ അന്വേഷണം ആരംഭിച്ചു. ഇരുവരും സ്വർണം കടത്താൻ ഉപയോഗിച്ച രീതി ഒന്നാണ്. അതിനാൽ ഇരുവരും ഒരേ മാഫിയയുടെ കണ്ണിയാണെന്നാണ് സംശയിക്കുന്നത്.
