ഷില്ലോങ്ങ്: മേഘാലയ മുഖ്യമന്ത്രിയായി നാഷനൽ പീപ്പിൾസ് പാർട്ടി (എൻപിപി) നേതാവ് കോൺറാഡ് സാംഗ്മ സത്യപ്രതിജ്ഞ ചെയ്തു. തുടർച്ചയായ രണ്ടാം വട്ടമാണ് സാംഗ്മ മേഘാലയ മുഖ്യമന്ത്രിയായി ചുമതലയേൽക്കുന്നത്. പ്രധാനമന്ത്രി നരേന്ദ്രമോദിയുടെ സാന്നിദ്ധ്യത്തിലായിരുന്നു സത്യപ്രതിജ്ഞാ ചടങ്ങുകൾ. കേന്ദ്ര ആഭ്യന്തരമന്ത്രി അമിത് ഷാ, ബിജെപി ദേശീയ അധ്യക്ഷൻ ജെപി നദ്ദ എന്നിവരും ചടങ്ങിൽ പങ്കെടുത്തു. എൻപിപി, ബിജെപി, യുഡിപി, എച്ച്എസ്പിഡിപി, പിഡിഎഫ് തുടങ്ങിയ പാർട്ടികളാണ് സാംഗ്മ ചെയർമാനായ മേഘാലയ ഡെമോക്രാറ്റിക് അലയൻസിന്റെ ഭാഗമാകുന്നത്.
മേഘാലയ ഗവർണർ ഫഗു ചൗഹാൻ മന്ത്രിസഭയുടെ ഭാഗമാകുന്ന 12 പേര്‍ക്കും സത്യവാചകം ചൊല്ലിക്കൊടുത്തു. എൻപിപിയുടെ പ്രെസ്റ്റോൺ ടിൻസോങ്ങ്, സ്‌നിഭലങ്ങ് ധർ എന്നിവർ ഉപമുഖ്യമന്ത്രിമാരായും ചുമതലയേറ്റു. അലക്സാണ്ടർ ലാലു ഹെക്, ഡോ അമ്പാരീൻ ലിംഗ്ഡോ, പോൾ ലിംഗ്ദോ, കൊമിംഗോൺ യിംബോൺ തുടങ്ങിയവരും മന്ത്രിമാരായി സത്യപ്രതിജ്ഞ ചെയ്തു. എൻപിപിയുടെ എട്ട് എംഎൽഎമാരും യുഡിപിയിൽ നിന്ന് രണ്ട്, ബിജെപി, എച്ച്എസ്പിഡിപി എന്നിവയിൽ നിന്ന് ഓരോരുത്തരും വീതമാണ് മന്ത്രിസഭയിലുള്ളത്.
നിലവിൽ സാംഗ്മ സർക്കാരിന് 45 എംഎൽഎമാരുടെ പിന്തുണയാണുള്ളത്. 59 മണ്ഡലങ്ങളിലാണ് തിരഞ്ഞെടുപ്പ് നടന്നത്. ഷില്ലോങ്ങിൽ സത്യപ്രതിജ്ഞാ ചടങ്ങിൽ പങ്കെടുത്ത ശേഷം പ്രധാനമന്ത്രി കൊഹിമയിലേക്ക് പോകും. ഇവിടെ നാഗാലാൻഡ് സർക്കാരിന്റെ സത്യപ്രതിജ്ഞാ ചടങ്ങിൽ പങ്കെടുക്കും. എൻഡിപിപിയുടെ നെയ്ഫ്യു റിയോ അഞ്ചാമതും മുഖ്യമന്ത്രിയായി സത്യപ്രതിജ്ഞ ചെയ്യും. ബിജെപിക്ക് ഉപമുഖ്യമന്ത്രി സ്ഥാനം ലഭിക്കും. നാളെ അസമിൽ മണിക് സാഹ സർക്കാരിന്റെ സത്യപ്രതിജ്ഞാ ചടങ്ങിലും പ്രധാനമന്ത്രി പങ്കെടുക്കുന്നുണ്ട്.
