മുംബൈ: വനിതാ പ്രീമിയർ ലീഗ് ക്രിക്കറ്റിൽ ഡൽഹി ക്യാപ്പിറ്റൽസിനെതിരെ മുംബൈ ഇന്ത്യൻസിന് തകർപ്പൻ ജയം. 8 വിക്കറ്റിനാണ് ഡൽഹിക്കെതിരെ മുംബൈയുടെ വിജയം.
ടോസ് നേടി ബാറ്റിംഗ് തിരഞ്ഞെടുത്ത ഡൽഹി, 18 ഓവറിൽ 105 റൺസിന് പുറത്തായി. മറുപടി ബാറ്റിംഗിൽ, 15 ഓവറിൽ 2 വിക്കറ്റ് നഷ്ടത്തിൽ മുംബൈ ലക്ഷ്യം മറികടന്നു.
3 വിക്കറ്റുകൾ വീതം വീഴ്ത്തിയ സൈക ഇഷാഖും വോംഗും ഹെയ്ലി മാത്യൂസും ചേർന്നാണ് ഡൽഹിയെ ദുർബലമായ സ്കോറിൽ ഒതുക്കിയത്.
43 റൺസെടുത്ത ക്യാപ്ടൻ മെഗ് ലാനിംഗ് മാത്രമാണ് ഡൽഹി നിരയിൽ അൽപ്പമെങ്കിലും പിടിച്ചു നിന്നത്. ജെമീമ റോഡ്രിഗസ് 25 റൺസെടുത്തു. 10 റൺസ് എടുത്ത രാധാ യാദവ് കഴിഞ്ഞാൽ മറ്റ് ഡൽഹി ബാറ്റർമാർ ആരും രണ്ടക്കം കടന്നില്ല.
ചെറിയ വിജയലക്ഷ്യം പിന്തുടർന്ന മുംബൈ അനായാസമാണ് ബാറ്റ് വീശിയത്. മുംബൈക്ക് വേണ്ടി ഓപ്പണർമാരായ ഹെയ്ലി മാത്യൂസ് 32 റൺസും യാസ്തിക ഭാട്ടിയ 41 റൺസും നേടി. ഒന്നാം വിക്കറ്റിൽ ഇരുവരും ചേർന്ന് 8.5 ഓവറിൽ 65 റൺസിന്റെ കൂട്ടുകെട്ട് പടുത്തുയർത്തി, മുബൈയുടെ സമ്മർദ്ദ സാദ്ധ്യത പൂർണമായും ഒഴിവാക്കി. 23 റൺസുമായി പുറത്താകാതെ നിന്ന നാറ്റ് സീവർ ബ്രന്റും 11 റൺസുമായി പുറത്താകാതെ നിന്ന ക്യാപ്ടൻ ഹർമൻപ്രീത് കൗറും ചേർന്ന് അനായാസം മുംബൈയെ വിജയത്തിലെത്തിച്ചു.
ഡൽഹിക്ക് വേണ്ടി ആലീസ് കാപ്സിയും താര നോറിസും ഓരോ വിക്കറ്റ് വീഴ്ത്തി.
