തൃശൂർ: കൊടുങ്ങല്ലൂർ ശ്രീകുരുംബ ഭഗവതി ക്ഷേത്രത്തിലെ മീനഭരണി മഹോത്സവത്തിന്റെ ഭാഗമായുള്ള അന്നദാന മഹായജ്ഞത്തിനുള്ള ഒരുക്കങ്ങൾ പൂർത്തിയാക്കി സേവാഭാരതി. സേവാഭാരതിയുടെ നേതൃത്വത്തിൽ നൂറോളം സാമുദായിക സന്നദ്ധ സേവാ സംഘടനകളാണ് മൂന്ന് ദിവസത്തെ തുടർച്ചയായ അന്നദാന മഹായജ്ഞത്തിൽ പങ്കാളികളാകുന്നത്.
മീനഭരണി മഹോത്സവത്തിന്റെ ഭാഗമായി മാർച്ച് 22,23,24 തീയതികളിലാണ് അന്നദാന മഹായജ്ഞം നടക്കുന്നത്. ഇതിന്റെ നാന്ദി കുറിച്ചുകൊണ്ട് ഭക്തിനിർഭരമായ അന്തരീക്ഷത്തിൽ നടന്ന കലവറ നിറക്കൽ ചടങ്ങിൽ അസംഖ്യം ഭക്തജനങ്ങൾ നേർച്ചകൾ സമർപ്പിച്ചു. രണ്ട് ലക്ഷത്തോളം പേർക്കുള്ള അന്നദാന മഹായജ്ഞത്തിനായുള്ള എല്ലാ ഒരുക്കങ്ങളും പൂർത്തിയായതായി സംഘാടക സമിതി അറിയിച്ചു.
അന്നദാന മഹായജ്ഞത്തിന്റെ ഭാഗമായി, രേവതി അശ്വതി നാളുകളിൽ ക്ഷേത്രത്തിൽ എത്തുന്നവർക്ക് പ്രഭാതഭക്ഷണമുണ്ടാകും. മൂന്ന് ദിവസവും വിഭവസമൃദ്ധമായ സമൂഹസദ്യയും എല്ലാ ഭക്തജനങ്ങൾക്കും കുടിവെള്ള വിതരണവുമുണ്ടാകും. ഉത്സവ ദിവസങ്ങളിൽ ഇരുപതോളം ആരോഗ്യ പ്രവർത്തകരുടെ മുഴുവൻ സമയ സേവനവും സേവാഭാരതി ഭക്തജനങ്ങൾക്കായി ഒരുക്കിയിട്ടുണ്ട്. മൂന്ന് ദിവസവും തുടർച്ചയായി 24 മണിക്കൂറും ആംബുലൻസ് സൗകര്യം സജ്ജീകരിക്കും. കൂട്ടം തെറ്റിയവർക്കും വസ്തുക്കൾ നഷ്ടപ്പെട്ടവർക്കുമുള്ള സഹായ കേന്ദ്രം എന്ന നിലയിൽ സേവാഭാരതിയുടെ ഇൻഫർമേഷൻ സെന്ററും പ്രവർത്തിക്കും.
