ആംസ്റ്റർഡാം: നെതർലൻഡ്സിന്റെ സാമ്പത്തിക സുരക്ഷയ്ക്ക് ചൈന കനത്ത ഭീഷണി ഉയർത്തുന്നതായി ഡച്ച് ഇന്റലിജൻസ് റിപ്പോർട്ട്. നെതർലൻഡ്സിലെ പുതിയ സാങ്കേതിക വിദ്യകളിൽ ചൈന കണ്ണുവെക്കുകയാണ്. ഇവയൊക്കെ മോഷ്ടിക്കാൻ ചൈന പദ്ധതിയിടുന്നതായും നെതർലൻഡ്സ് ജനറൽ ഇന്റലിജൻസ് ആൻഡ് സെക്യൂരിറ്റി സർവീസ് ഡയറക്ടർ ജനറൽ എറിക് അകെർബൂം വ്യക്തമാക്കി.
യുക്രെയ്ൻ യുദ്ധത്തെ മറയാക്കി നെതർലൻഡ്സ് അടക്കമുള്ള യൂറോപ്യൻ രാജ്യങ്ങൾക്ക് മേൽ ചൈന ചാരപ്രവർത്തനങ്ങളും സൈബർ ആക്രമണങ്ങളും വർദ്ധിപ്പിച്ചതായും ഡച്ച് ഇന്റലിജൻസ് ഏജൻസി റിപ്പോർട്ട് ചെയ്യുന്നു. ഈ സാഹചര്യത്തിൽ, ചിപ്പ് നിർമാണ സാമഗ്രികളുടെ ചൈനയിലേക്കുള്ള കയറ്റുമതിക്ക് മേൽ നെതർലൻഡ്സ് അടുത്തയിടെ നിയന്ത്രണങ്ങൾ കൊണ്ടുവന്ന കാര്യവും ഡച്ച് അധികൃതർ ചൂണ്ടിക്കാട്ടി.
എന്നാൽ, നെതർലൻഡ്സിന്റെ ആരോപണങ്ങൾ അവാസ്തവമാണെന്ന് ചൈന പ്രതികരിച്ചു. ഇത്തരം ആരോപണങ്ങൾ ഉഭയകക്ഷി സഹകരണത്തെ ബാധിക്കുമെന്നും നെതർലൻഡ്സിന്റെ ഭാവിക്ക് ഗുണകരമാകില്ലെന്നും ചൈനീസ് വിദേശകാര്യ വക്താവ് വാംഗ് വെബിൻ പറഞ്ഞു.
