സംവിധായകൻ മണിരത്‌നത്തിന്റെ സ്വപ്ന സാക്ഷാത്കാരമായ’ പൊന്നിയിൻ സെൽവൻ’ രണ്ടാം ഭാഗത്തിന് ലോകമെമ്പാടുമുള്ള സിനിമാ പ്രേമികളിൽ നിന്നും വൻ സ്വീകരണമാണ് ലഭിച്ചിരിക്കുന്നത് എന്ന് തെളിയിക്കുന്ന ബോക്‌സ് ഓഫീസ് കളക്ഷൻ റിപ്പോർട്ടുകൾ പുറത്ത്. റിലീസ് ആയി രണ്ടാം ദിവസം നൂറ് കോടി ക്ലബ്ബിൽ കയറിയിരിക്കുകയാണ് ചിത്രം. ആഗോള തലത്തിലുള്ള കളക്ഷനാണിത്.
ലോകത്താകമാനമായി രണ്ടു ദിവസത്തെ ഗ്രോസ്സ് കളക്ഷൻ 109.6 കോടിയാണ്. ഇന്ത്യയിൽ മാത്രം രണ്ടു ദിവസത്തെ കളക്ഷൻ 57.9 കോടിയാണ്. നോർത്ത് അമേരിക്കയിൽ പ്രീമിയർ ഷോ ഉൾപ്പെടെ രണ്ടു ദിവസത്തെ ഗ്രോസ് കളക്ഷൻ മാത്രം 2.5 മില്ല്യൻ ഡോളറിന് മുകളിലാണെന്ന് നിർമ്മാതാക്കളായ ലൈക്കാ പ്രൊഡക്ഷൻസും മദ്രാസ് ടാക്കീസും ഔദ്യോഗികമായി വെളിപ്പെടുത്തി.
കേരള ബോക്‌സ് ഓഫീസിൽ വിജയിയുടെ വാരിസിന് ശേഷം ഈ വർഷത്തെ ബിഗ്ഗസ്റ്റ് ഓപ്പണിങ് മൂവി എന്ന ബഹുമതിക്ക് അർഹമാവുകയാണ് പിഎസ്2. ചിത്രം സർവകാല റിക്കാർഡുകൾ ഭേദിക്കും എന്നാണ് വിലയിരുത്തൽ.
പി എസ് 1 നെ അപേക്ഷിച്ച് ചടുലമായ കഥാ ഉള്ളടക്കം, ആഖ്യാനം, സാങ്കേതിക മികവ്, മണിരത്‌നത്തിന്റെ മാസ്മരികമായ ദൃശ്യാവിഷ്‌ക്കാര ചാരുത എന്നിവ കൊണ്ട് ആരാധകരെ വിസ്മയിപ്പിച്ചിരിക്കയാണ് പിഎസ്2 എന്ന ബ്രഹ്മാണ്ഡ ഇതിഹാസ സൃഷ്ടി. തമിഴ് , മലയാളം, തെലുങ്ക്, കന്നഡ, ഹിന്ദി എന്നീ അഞ്ചു ഭാഷകളിലാണ് ചിത്രം പ്രദർശനത്തിനെത്തിയത്.
വിക്രം, കാർത്തി, ജയം രവി, ഐശ്വര്യാ റായ് ബച്ചൻ, തൃഷ കൃഷ്ണ, ശോഭിതാ ധൂലിപാല, ഐശ്വര്യ ലക്ഷ്മി, ജയചിത്ര, ജയറാം, റഹ്മാൻ, പ്രഭു, ശരത് കുമാർ, പാർത്ഥിപൻ, വിക്രം പ്രഭു, ബാബു ആന്റണി, ലാൽ, റിയാസ് ഖാൻ, കിഷോർ അശ്വിൻ കാകുമാനു, റിയാസ് ഖാൻ,മോഹൻ റാം, എന്നിവരാണ് ചിത്രത്തിലെ പ്രധാന അഭിനേതാക്കൾ.
