താൻ മിസ് വേൾഡ് കിരീടം അണിയുമ്പോൾ തന്റെ ഭർത്താവിന് ഏഴ് വയസ് മാത്രമായിരുന്നു പ്രായം എന്ന് വെളിപ്പെടുത്തി ബോളിവുഡ് താരം പ്രിയങ്ക ചോപ്ര. അന്ന് അമേരിക്കയിലെ വീട്ടിലിരുന്ന് അമ്മയും നിക്ക് ജൊനാസും ആ ചടങ്ങ് കണ്ടിരുന്നുവെന്നും താരം പറഞ്ഞു. ലവ് എഗെയ്ൻ എന്ന പുതിയ ഹോളിവുഡ് ചിത്രത്തിന്റെ പ്രൊമോഷന്റെ ഭാഗമായി ജെന്നിഫർ ഹഡ്സണന്റെ ടോക്ക് ഷോയിൽ സംസാരിക്കുകയായിരുന്നു പ്രിയങ്ക ചോപ്ര.
” നിക്ക് ചെറിയ കുട്ടിയായിരുന്നപ്പോൾ എന്നെ കണ്ടിട്ടുണ്ട്. അത് ടെലിവിഷനിലൂടെയായിരുന്നു. വിവാഹത്തിന് ശേഷം നിക്കിന്റെ അമ്മയാണ് ഇക്കാര്യം എന്നോട് പറഞ്ഞത്. 18-ാം വയസിലാണ് എനിക്ക് ലോകസുന്ദരി പട്ടം ലഭിക്കുന്നത്. 2000 നവംബറിലായിരുന്നു അത്. ആ ചടങ്ങ് അന്ന് ടെലിവിഷനിലൂടെ കണ്ടിരുന്നതായി അമ്മ പറഞ്ഞു. അന്ന് നിക്കിന് ഏഴ് വയസായിരുന്നു പ്രായം. എനിക്ക് 18 വയസ് പൂർത്തിയായിരുന്നു.
അച്ഛൻ കെവിൻ സീനിയറിന് സൗന്ദര്യ മത്സരങ്ങൾ കാണുന്നത് ഇഷ്ടമായിരുന്നു. അങ്ങനെയാണ് എല്ലാവരും ഒരുമിച്ചിരുന്ന് ഇത് കാണാനിടയായത്. അപ്പോൾ നിക്കും അവർക്കൊപ്പമിരുന്ന് പരിപാടിയുടെ ചില ഭാഗങ്ങൾ കണ്ടു” പ്രിയങ്ക പറഞ്ഞു.
