ആരോഗ്യ പ്രശ്നങ്ങളെ തുടർന്ന് അഭിനയ ലോകത്ത് നിന്ന് ഇടവേളയെടുക്കാൻ തീരുമാനിച്ച് സാമന്ത റൂത്ത് പ്രഭു. നാളുകളായി മയോസൈറ്റിസ് എന്ന രോഗത്തോട് പോരാടുകയാണ് താരം. ശരീരം വണ്ണംവെയ്ക്കുന്നു, ക്ഷീണിക്കുന്നു, ചില ദിവസങ്ങളിൽ അസുഖങ്ങളുണ്ടായേക്കാം ഇതൊന്നും നമുക്ക് നിയന്ത്രിക്കാനാവില്ല. എന്നാൽ കണ്ണുകൾ വികാരങ്ങൾ പ്രകടിപ്പിക്കാനുള്ള മാദ്ധ്യമമാണ്. താരം എന്ന നിലയിൽ അത് വളരെയേറേ ശ്രദ്ധിക്കേണ്ട കാര്യമാണ്.
എല്ലാ ദിവസവും കണ്ണുകളിൽ ഇൻജക്ഷൻ വെയ്ക്കേണ്ടതുണ്ട്. വെളിച്ചം അടിക്കുമ്പോൾ കണ്ണ് വളരെ സെൻസിറ്റീവ് ആകുന്നു. വിനോദത്തിനും സ്റ്റൈലിനുമായി ഞാൻ കണ്ണട ധരിക്കാറില്ല, വെളിച്ചം യഥാർത്ഥത്തിൽ എന്റെ കണ്ണുകൾക്ക് ബുദ്ധിമുട്ടാവുകയാണ്. എനിക്ക് തീവ്രമായ മൈഗ്രേൻ ഉണ്ട്, എന്റെ കണ്ണുകൾക്ക് കടുത്ത വേദനയുണ്ട്, വേദന കാരണം കണ്ണ് തടിച്ച് വരുന്നു. കഴിഞ്ഞ 8 മാസമായി ഇതാണ് സ്ഥിതി. ഒരു താരത്തിന് സംഭവിക്കാവുന്ന ഏറ്റവും മോശമായ കാര്യമാണിതെന്നും സാമന്ത പ്രതികരിച്ചു.
ആരോഗ്യ കാര്യങ്ങളിൽ ശ്രദ്ധിക്കാനായി സിനിമാ ലോകത്ത് നിന്ന് അല്പകാലം മാറിനിൽക്കാൻ സാമന്ത തീരുമാനിച്ചതായാണ് റിപ്പോർട്ടുകൾ. തെലുങ്ക് , ബോളിവുഡ് സിനിമകളൊന്നും താരം പുതിയതായി ഒപ്പിടില്ല. ആരോഗ്യം വീണ്ടെടുക്കാനായി കൂടുതൽ ചികിത്സ ആവശ്യമുണ്ടെന്നും താരം അതിനായി തയ്യാറെടുക്കുകയാണെന്നുമാണ് റിപ്പോർട്ടുകൾ. നേരത്തെ ചില സിനിമകൾ ഏറ്റെടുത്തിരുന്നു. എന്നാൽ ഈ സിനിമകൾക്കായി മുൻകൂർ വാങിയ പണം സാമന്ത നിർമ്മാതാക്കൾക്ക് തിരിച്ചു നൽകി.
വിജയ് ദേവരകൊണ്ടയ്‌ക്കൊപ്പമുള്ള കുഷി എന്ന സിനിമയുടെ ചിത്രീകരണത്തിലാണ് താരമിപ്പോൾ. സിനിമയുടെ അവസാന ഷൂട്ടിംഗ് ഷെഡ്യൂളാണ് ഇപ്പോൾ നടക്കുന്നത്. ഇത് രണ്ടോ മൂന്നോ ദിവസത്തിനുള്ളിൽ പൂർത്തിയാകും. സിറ്റാഡൽ എന്ന ആമസോൺ സീരീസും ഏകദേശം പൂർത്തിയാക്കി. ഇതോടെ ഏറ്റെടുത്ത പ്രോജക്ടുകളിൽ നിന്ന് താരം പൂർണ്ണമായും സ്വതന്ത്രയാകും.
