തിരുവനന്തപുരം: പി.വി അൻവർ എംഎൽഎയ്‌ക്കെതിരെ പരാതി നൽകി ഏഷ്യാനെറ്റ് ന്യൂസ് അസോസിയേറ്റ് എഡിറ്റർ വിനു.വി ജോൺ. ഭീഷണി മുഴക്കിയ സംഭവത്തിലാണ് വിനു വി ജോൺ പരാതി നൽകിയിരിക്കുന്നത്. സംസ്ഥാന പോലീസ് മേധാവിയ്ക്ക് ആണ് പരാതി.
ഓൺലൈൻ മാദ്ധ്യമമായ മറുനാടൻ മലയാളിയിൽ പോലീസ് നടത്തിയ പരിശോധനയെ വിമർശിച്ച് ചാനൽ ചർച്ചയിൽ വിനു വി ജോൺ ചില പരാമർശങ്ങൾ നടത്തിയിരുന്നു. ഇതിന് പിന്നാലെയാണ് അൻവർ എംഎൽഎ വിനുവിനെതിരെ ഭീഷണിയുമായി രംഗത്ത് എത്തിയത്. ഫേസ്ബുക്ക് പോസ്റ്റിലൂടെയായിരുന്നു അൻവർ എംഎൽഎയുടെ പരോക്ഷ ഭീഷണി. ഇതിലാണ് വിനു വി ജോൺ സംസ്ഥാന പോലീസ് മേധാവിയ്ക്ക് പരാതി നൽകിയത്.
നേരത്തെ മറുനാടൻ മലയാളിയിൽ നടന്ന പോലീസ് പരിശോധനയെ വിമർശിച്ച് പത്രക്കുറിപ്പ് ഇറക്കിയതിന് പിന്നാലെ തിരുവനന്തപുരം പ്രസ് ക്ലബ്ബ് പ്രസിഡന്റ് എം.രാധാകൃഷ്ണനെതിരെ പി.വി അൻവർ എംഎൽഎയുടെ അനുയായികൾ ഭീഷണിയുമായി രംഗത്ത് എത്തിയിരുന്നു. ഇതിൽ അദ്ദേഹവും ഡിജിപിയ്ക്ക് പരാതി നൽകിയിട്ടുണ്ട്. ഇതിന പിന്നാലെയായിരുന്നു വിനു വി ജോണും പോലീസിനെ സമീപിച്ചിട്ടുള്ളത്.
