ബംഗളൂരു: ഇന്ത്യയുടെ അഭിമാന ദൗത്യമായ ചാന്ദ്രയാൻ 3 അതിന്റെ അവസാനഘട്ട ചാന്ദ്രഗുരുത്വാകർഷണ വലയം താഴ്ത്തലും വിജയകരമായി പൂർത്തീകരിച്ചു. നാലാം ഗുരുത്വാകർഷണ വലയം താഴ്ത്തലാണ് ഇന്ന് നടന്നത്. ഇതോടെ ചാന്ദ്രയാൻ ചന്ദ്രനോട് ഏറ്റവും അടുത്തെത്തി..28 സെക്കൻഡ് മാത്രമുള്ള ഈ ജ്വലനത്തോടെയാണ് ഇത് സാധ്യമാക്കിയത്. 153 കിലോമീറ്റർ മാത്രമാണ് ഇപ്പോൾ ചന്ദ്രനിലേക്കുള്ള ദൂരം. വൃത്തപഥത്തിലാണ് ഇനി ചാന്ദ്രയാൻ ചന്ദ്രനെ വലയം വെയ്ക്കുക. നാളെ ലാൻഡറും പ്രൊപ്പൻഷൽ മൊഡ്യൂളും വേർപ്പെടുത്തും.
ഇന്നത്തെ ഗുരുത്വാകർഷണ വലയം താഴ്ത്തൽ വിജയകരമായതോടെ, സോഫ്റ്റ് ലാൻഡിംഗിലേയ്ക്ക് ഒരു ഘട്ടം മാത്രമാണ് അവശേഷിക്കുന്നത്.ബംഗളൂരുവിലെ നിയന്ത്രണകേന്ദ്രമായ ഇസ്ട്രാക്കിൽനിന്നുള്ള കമാൻഡുകൾ പേടകം കൃത്യതയോടെ സ്വീകരിച്ച് പ്രതികരിക്കുന്നുണ്ട്. ലാൻഡർ, റോവർ എന്നിവയിലെ പരീക്ഷണ ഉപകരണങ്ങൾ, സോഫ്റ്റ്വെയർ എന്നിവയുടെ ക്ഷമതാ പരിശോധനയും തുടരുകയാണ്.
ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്നും ജൂലൈ 14 നായിരുന്നു ചന്ദ്രയാൻ -3 കുതിച്ചുയർന്നത്. ഇന്ത്യയുടെ വിജയം വാനോളം ഉയരുന്നത് ഉറ്റു നോക്കി കൊണ്ടിരിക്കുകയാണ് ഒരു കൂട്ടം ജനത.
