ബംഗളുരു : ഇന്ത്യയുടെ ചന്ദ്രയാന്‍ മൂന്ന് ദൗത്യം അതിന്റെ ചാന്ദ്ര പര്യവേഷണ യാത്രയില്‍ മറ്റൊരു നാഴികകല്ല കൂടി പിന്നിട്ടു. ചന്ദ്രനില്‍ ഇറങ്ങാന്‍ തയ്യാറെടുക്കുന്നതിന്റെ ഭാഗമായി വിക്രം ലാന്‍ഡര്‍ പ്രൊപ്പല്‍ഷന്‍ മൊഡ്യൂളില്‍ നിന്ന് ഇന്ന് വിജയകരമായി വേര്‍പെട്ടു. ഇതോടെ ഓഗസ്റ്റ് 23 ന് വൈകിട്ട് 5.47 ഓടെ ലാന്‍ഡര്‍ ചന്ദ്രനില്‍ ഇറങ്ങുമെന്നാണ് ഐഎസ്ആര്‍ഒയുടെ വിലയിരുത്തല്‍.
നീണ്ട 33 ദിവസങ്ങള്‍ക്ക് ശേഷമാണ് പ്രൊപ്പല്‍ഷന്‍ മൊഡ്യൂളിനെ വിട്ട് വിക്രം ലാന്‍ഡര്‍ ചന്ദ്രനിലേക്ക് യാത്ര തുടങ്ങിയത്. ഇനി ത്രസ്റ്റര്‍ എഞ്ചിന്‍ ഉപയോഗിച്ച് വേഗം കുറച്ച് ചന്ദ്രോപരിതലത്തിലേക്ക് ഇറങ്ങാനുള്ള തയ്യറെടുപ്പുകള്‍ വിക്രം ലാന്‍ഡര്‍ തുടങ്ങി കഴിഞ്ഞു. ഇതിന്റെ ആദ്യ പടിയായ ഡിബൂസ്റ്റിംഗ് നാളെ വൈകിട്ട് 4 മണിക്ക് നടക്കുമെന്ന് ഐഎസ്ആര്‍ഒ വ്യക്തമാക്കി.
ചന്ദ്രന്റെ ഉപരിതലത്തില്‍ നിന്ന് 800 മീറ്റര്‍ ഉയരത്തില്‍ എത്തുമ്പോള്‍ രണ്ട് ത്രസ്റ്റര്‍ എഞ്ചിനുകളുടെ സഹായത്തോടെ അന്തരീക്ഷത്തിന്‍ അല്‍പ നേരം നിശ്ചലമായി നില്‍ക്കും. പിന്നീട് വേഗം കുറച്ച് സെക്കന്‍ഡില്‍ ഒന്നു മുതല്‍ രണ്ട് മീറ്റര്‍ എന്ന വേഗത്തിലാകും താഴേയ്ക്കിറങ്ങുക. ചന്ദ്രയാന്‍ രണ്ടില്‍ ഇല്ലാതിരുന്ന ലേസര്‍ ഡൊപ്ലര്‍ വെലോസിറ്റി മീറ്റര്‍ ഇത്തവണ ചന്ദ്രയാന്‍ 3 ല്‍ ഘടിപ്പിച്ചിട്ടുണ്ട്. ഇത് ലാന്‍ഡറിന്റെ വേഗം കൃത്യമായി നിയന്ത്രിച്ച് ചന്ദ്രനില്‍ ഇറങ്ങാന്‍ സഹായിക്കും.
ഓഗസ്റ്റ് 23 ന് വൈകിട്ട് 5.47 ഓടെ ചന്ദ്രനില്‍ ഇറങ്ങുന്ന ലാന്‍ഡര്‍ നിന്ന് റാംപ് തുറന്ന് റോവര്‍ പുറത്തിറങ്ങും. ഒരു കിലോമീറ്റര്‍ ചുറ്റളവില്‍ സഞ്ചരിക്കാന്‍ റോവറിന് കഴിയും. ഇതോടെ ചന്ദ്രോപരിതലത്തില്‍ ഇറങ്ങുന്ന നാലാമത്തെ രാജ്യമായി ഇന്ത്യ മാറും. ഈ ചരിത്ര നിമിഷത്തിന് സാക്ഷ്യം വഹിക്കാന്‍ പ്രാര്‍ഥനയോടെ കാത്തിരിക്കുകയാണ് ലോകമെമ്പാടുമുള്ള ഇന്ത്യക്കാര്‍.
