ഇന്ത്യന്‍ സിനിമ ചരിത്രത്തില്‍ ഇത് റെക്കോര്‍ഡുകളുടെ കാലം. ബാഹുബലി 2 നേയും പിന്തള്ളി ഗദര്‍ 2 എക്കാലത്തെയും ഏറ്റവും കൂടുതല്‍ വരുമാനം നേടിയ രണ്ടാമത്തെ ഹിന്ദി ചിത്രമായി മാറി. റിലീസ് ചെയ്ത് 29 ദിവസം കൊണ്ട് ആഭ്യന്തര ബോക്സ് ഓഫീസില്‍ 511 കോടി രൂപയാണ് ഗദര്‍ 2 നേടിയത്.
പുതിയ റിലീസുകള്‍ ഉണ്ടായിരുന്നിട്ടും, ആഭ്യന്തര ബോക്‌സോഫീസില്‍ ഗദര്‍ 2 കുതിപ്പ് തുടരുകയാണ്. ഓഗസ്റ്റ് 11 നാണ് ചിത്രം തിയേറ്ററുകളില്‍ ഇറങ്ങിയത്. റിലീസ് ചെയ്ത് വെറും 29 ദിവസത്തിനുള്ളില്‍ 511 കോടി നേടിയ ഗദര്‍ 2, പ്രഭാസിന്റെ ബാഹുബലി 2 ന്റെ ബോക്‌സോഫീസ് കളക്ഷനെ മറികടന്നു. 510.99 കോടിയായിരുന്നു ബാഹുബലി നേടിയത്. ഇതോടെ ഏറ്റവും കൂടുതല്‍ കളക്ഷന്‍ നേടുന്ന രണ്ടാമത്തെ ചിത്രമായി ഗദര്‍ മാറി.
മുന്‍പ് ഏറ്റവും വേഗത്തില്‍ 450 കോടി കടന്ന ഹിന്ദി ചിത്രമെന്ന റെക്കോര്‍ഡ് ഗദര്‍ 2 സ്വന്തമാക്കിയിരുന്നു. ബോളിവുഡില്‍ സമീപകാലത്ത് ഏറ്റവും ചലനമുണ്ടാക്കിയ ചിത്രമായ ‘ഗദര്‍ 2’വിന്റെ വിജയം അമ്പരപ്പിക്കുന്നതാണ്. സണ്ണി ഡിയോളിന്റെ മികച്ച തിരിച്ചുവരവാണ് ഇതെന്ന് നിരൂപകരടക്കം അഭിപ്രായപ്പെടുന്നു.
2001ല്‍ പുറത്തിറങ്ങിയ വന്‍ വിജയമായ ചിത്രം ‘ഗദര്‍: ഏക് പ്രേം കഥ’യുടെ രണ്ടാം ഭാഗമാണ് ഗദര്‍ 2. സണ്ണി ഡിയോളും അമീഷ പട്ടേലുമാണ് ചിത്രത്തിലെ കേന്ദ്ര കഥാപാത്രങ്ങള്‍. അനില്‍ ശര്‍മയാണ് ചിത്രത്തിന്റെ സംവിധാനം. ഉത്കര്‍ഷ ശര്‍മ, മനിഷ വധ്‌വാ, ഗൗരവ് ചോപ്ര, സിമത്ര കൗര്‍, രാജശ്രീ, മുഷ്താഖ് ഖാന്‍, രാകേഷ് ഭേദി, അനാമിക സിംഗ്, ലുബ്‌ന തുടങ്ങി ഒട്ടേറെ താരങ്ങളും ‘ഗദര്‍ 2’വില്‍ വേഷമിടുന്നു. അനില്‍ ശര്‍മ തന്നെയാണ് നിര്‍മാവും. മിതൂന്‍ ആണ് ചിത്രത്തിന്റെ സംഗീത സംവിധാനം നിര്‍വഹിച്ചിരിക്കുന്നത്.
