ന്യൂഡൽഹി: കളമശ്ശേരി ബോംബ് സ്‌ഫോടനത്തിൽ മതം മാത്രം ചർച്ചയാക്കാതെ സുരക്ഷയെക്കുറിച്ച് മുഖ്യമന്ത്രി സംസാരിക്കണമെന്ന് കേന്ദ്രമന്ത്രി വി. മുരളീധരൻ. സംസ്ഥാനത്ത് ട്രെയിനുകളിലും പ്രാർഥനാലയത്തിലും ഉൾപ്പെടെ നിരപരാധികൾ ആക്രമിക്കപ്പെടുന്നു. മതമേതായാലും വിദ്വേഷം കൊണ്ടുനടക്കുന്ന ആർക്കും ആരേയും അപായപ്പെടുത്താമെന്ന അവസ്ഥ നിലനിൽക്കുന്നുവെന്നും മുരളീധരൻ പറഞ്ഞു.
മതധ്രുവീകരണം ലക്ഷ്യംവെച്ചുള്ള പരാമർശങ്ങൾ പിണറായി വിജയൻ നടത്തുന്നത് തിരഞ്ഞെടുപ്പ് മുന്നിൽക്കണ്ടാണ്. സംസ്ഥാനത്ത് ആഭ്യന്തരവകുപ്പ് സമ്പൂർണ പരാജയമാണ്. പോലീസ്-ഇന്റലിജൻസ് സംവിധാനം പൂർണമായും തകർന്നു. ഐക്യത്തെക്കുറിച്ച് മാത്രം പിണറായി വിജയൻ വിശദീകരിച്ചാൽ പോരാ. ജനങ്ങളുടെ സ്വത്തിനും ജീവനും എന്ത് സുരക്ഷയാണ് ഒരുക്കുന്നതെന്ന് ജനങ്ങളോട് പറയണം. അക്രമം നടന്നിട്ട് അക്രമിയെ കണ്ടെത്തിയാൽ പോരെന്നും അതിക്രമങ്ങൾ തടയാനാകണമെന്നും മുരളീധരൻ വിമർശിച്ചു.
കേന്ദ്രമന്ത്രി രാജീവ് ചന്ദ്രശേഖരനെതിരെ കേസെടുത്തത് മതധ്രുവീകരണം ലക്ഷ്യമിട്ടെന്നാണെന്നും മുരളീധരൻ കുറ്റപ്പെടുത്തി. രാജീവ് ചന്ദ്രശേഖർ പേടിച്ചോടാൻ പോകുന്നില്ലെന്നും ആദ്യം കേസെടുക്കേണ്ടത് സിപിഎം സംസ്ഥാന സെക്രട്ടറിക്കെതിരെയാണെന്നും മുരളീധരൻ പറഞ്ഞു. കളമശേരിയിലെ സ്ഫോടനം ഭീകരപ്രവർത്തനമാണെന്നതിൽ തർക്കമില്ലെന്നും മുഖ്യമന്ത്രി ജനങ്ങളുടെ ആശങ്ക പരിഹരിക്കണമെന്നും അദ്ദേഹം കൂട്ടിച്ചേർത്തു.
