ചെന്നൈ: ദേശീയ ഗാനത്തെ അപമാനിച്ച് തമിഴ് നടൻ മൻസൂർ അലിഖാൻ. സംഭവത്തിൽ നടനെതിരെ ശക്തമായ പ്രതിഷേധമാണ് ഉയരുന്നത്. നടി തൃഷയ്‌ക്കെതിരെ നടത്തിയ അശ്ലീല പരാമർശത്തിൽ നിയമനടപടി നേരിട്ടുകൊണ്ടിരിക്കെയാണ് നടൻ ദേശീയ ഗാനത്തെ അവഹേളിച്ചെന്ന വാർത്തകൾ പുറത്തുവരുന്നത്.
തൃഷയ്‌ക്കെതിരെ നടത്തിയ പരാമർശത്തിൽ വിശദീകരണം നൽകുന്നതിനായി മൻസൂർ അലിഖാൻ വാർത്താസമ്മേളനം വിളിച്ച് ചേർത്തിരുന്നു. ഇതിനിടെയായിരുന്നു നടൻ ദേശീയ ഗാനത്തെ അവഹേളിച്ചത്. വാർത്താസമ്മേളനം കഴിഞ്ഞ ശേഷം നടൻ ദേശീയ ഗാനം ആക്ഷൻ സോംഗ് എന്ന രീതിയിൽ പാടുകയായിരുന്നു. ചിട്ടകളൊന്നും പാലിക്കാതെ മേശയിൽകൊട്ടുകയും ചെയ്തു.
ഇത് കണ്ട മാദ്ധ്യമപ്രവർത്തകർ സംഭവം ചോദ്യം ചെയ്തു. എന്നാൽ മൻസൂർ അലിഖാൻ അവരോട് കയർക്കുകയായിരുന്നു. നിങ്ങളെയൊക്കെ ആരാണ് അയച്ചത് എന്ന് തനിക്ക് അറിയാമെന്നും നിങ്ങൾക്ക് ഭ്രാന്താണെന്നും ആയിരുന്നു മൻസൂർ അലിഖാൻ പ്രതികരിച്ചത്. . ദേശീയ ഗാനത്തെ അവഹേളിച്ചതിൽ നടനെതിരെ ശക്തമായ നടപടിയുണ്ടായേക്കും എന്നാണ് സൂചന.
