മുംബൈ : മഹാരാഷ്ട്ര മുഖ്യമന്ത്രി ഏകനാഥ് ഷിൻഡെയെ അധിക്ഷേപിച്ചതിന് മുൻ മുംബൈ മേയർ ദത്ത ദൽവിയെ അറസ്റ്റ് ചെയ്തു. ശിവസേന ഉദ്ധവ് താക്കറെ വിഭാഗം നേതാവാണ് ദത്ത ദൽവി.
ഞായറാഴ്ച ഭണ്ഡൂപ്പിൽ നടന്ന പാർട്ടി പരിപാടിയിൽ മഹാരാഷ്ട്ര മുഖ്യമന്ത്രി ഏകനാഥ് ഷിൻഡെയ്ക്കെതിരെ രൂക്ഷമായ ഭാഷയിലുള്ള അപകീർത്തി പരാമർശങ്ങളാണ് അദ്ദേഹം നടത്തിയിരുന്നത്.
ശിവസേനയുടെ ഷിൻഡെ വിഭാഗത്തിൽ നിന്നുള്ള ഭൂഷൺ പലാണ്ഡെ തിങ്കളാഴ്ച ഭാണ്ഡൂപ്പ് പോലീസ് സ്റ്റേഷനിൽ രേഖാമൂലം പരാതി നൽകിയതിനെ തുടർന്നാണ് മുൻ മുംബൈ മേയർക്കെതിരെ നടപടി എടുത്തിരിക്കുന്നത്. നിരവധി ശിവസേന ഉദ്ധവ് താക്കറെ വിഭാഗം നേതാക്കളും എംഎൽഎമാരും പങ്കെടുത്തിരുന്ന ചടങ്ങിൽ വച്ചാണ് ഏകനാഥ് ഷിൻഡെയ്ക്കെതിരെ ദത്ത ദൽവി വളരെ മോശം ഭാഷയിൽ ഉള്ള പരാമർശങ്ങൾ നടത്തിയത്.
153 എ (1) (എ), 153 ബി (1) (ബി), 153 എ (1) (സി) (സമുദായങ്ങൾക്കിടയിൽ ഭിന്നതയുണ്ടാക്കൽ), 294 (അശ്ലീല പദപ്രയോഗം) എന്നീ വകുപ്പുകൾ പ്രകാരമാണ് ദൽവിക്കെതിരെ ഭണ്ഡൂപ്പ് പൊലീസ് സ്റ്റേഷനിൽ കേസ് രജിസ്റ്റർ ചെയ്തിരിക്കുന്നത്. ഇന്ത്യൻ ശിക്ഷാനിയമത്തിലെ 504 (മനഃപൂർവം അപമാനിക്കൽ), 505 വകുപ്പുകളും ദൽവിക്കെതിരെ ചുമത്തിയിട്ടുണ്ട്.
