സമൂഹമാദ്ധ്യമങ്ങൾ തുറന്നാൽ പലപ്പോഴും കാണുന്ന ചില പരസ്യവാചകങ്ങളുണ്ട്. എളുപ്പത്തിൽ ഭാരം കുറയ്ക്കാൻ സഹായിക്കാം എന്നുള്ള വാഗ്ദാനങ്ങൾ ആണ് ഇവയിൽ കൂടുതലും. ഒരാഴ്ച കൊണ്ട് നാല് കിലോ കുറയ്ക്കാം ഒരു മാസം കൊണ്ട് 10 കിലോ കുറയ്ക്കാം എന്നിങ്ങനെയൊക്കെ അമിതവണ്ണം ഉള്ളവരെ മോഹിപ്പിക്കുന്ന തരത്തിലുള്ള വലിയ വാഗ്ദാനങ്ങളാണ് പലരും നൽകുന്നത്. എന്നാൽ ഇത്തരത്തിൽ ദ്രുതഗതിയിൽ ഭാരം കുറയ്ക്കുന്നത് ശരീരത്തിന് ഏറെ അപകടം സൃഷ്ടിക്കുന്ന ഒന്നാണ്.
വിദഗ്ധ ഡോക്ടർമാരുടെയും ന്യൂട്രീഷനിസ്റ്റുകളുടെയും അഭിപ്രായത്തിൽ ഒരാൾ ആരോഗ്യകരമായ ഭാരം കുറയ്ക്കേണ്ടത് ആഴ്ചയിൽ ഒരു കിലോ മാത്രമാണ്. മാസത്തിൽ നാലു കിലോയിൽ കൂടുതൽ ഭാരം കുറയ്ക്കുന്നത് ശരീരത്തിന്റെ മൊത്തത്തിലുള്ള താളം തെറ്റിക്കുകയും മറ്റു പല അസുഖങ്ങൾക്കും കാരണമാകുകയും ചെയ്യുന്നതാണ്. ശരീരഭാരം പെട്ടെന്ന് കുറയ്ക്കുന്നത് ഫാറ്റിലിവർ പോലെയുള്ള പ്രശ്നങ്ങൾ ഉണ്ടാക്കാനും ഉള്ളവർക്ക് വഷളാകാനും സഹായിക്കുന്നതാണ്. അമിതവണ്ണം ഉള്ളവരിൽ പൊതുവേ ഫാറ്റി ലിവർ കാണപ്പെടുന്നതിനാൽ ശരീരഭാരം അപകടകരമായ രീതിയിൽ പെട്ടെന്ന് കുറയ്ക്കുമ്പോൾ ഫാറ്റി ലിവർ പ്രശ്നം ഗുരുതരം ആവുകയും വലിയ കരൾ രോഗങ്ങളിലേക്ക് എത്തുകയും പോലും ചെയ്യുന്നതാണ്.
ഫാറ്റിലിവറിനോടൊപ്പം തന്നെ പെട്ടെന്ന് ഭാരം കുറയ്ക്കുന്നത് പിത്തസഞ്ചിയിൽ കല്ലുകൾ രൂപപ്പെടുന്നതിനും കാരണമാകും. കൂടാതെ ദ്രുതഗതിയിലുള്ള ഭാരം കുറയൽ ഇലക്ട്രോലൈറ്റ് അസന്തുലിതാവസ്ഥ ഉണ്ടാക്കാവുന്നതാണ്. ഇത്തരത്തിൽ പെട്ടെന്ന് ഭാരം കുറയ്ക്കുന്നവരിൽ ആവശ്യത്തിന് പോഷകങ്ങൾ ലഭിക്കാത്തതിനാൽ പോഷകക്കുറവ് കൊണ്ടുള്ള പ്രശ്നങ്ങളും ഉണ്ടാകും. പെട്ടെന്നുള്ള മുടികൊഴിച്ചിൽ പോലെയുള്ളവ ഇതിന് ഒരു ഉദാഹരണമാണ്. ഭാരം കുറയ്ക്കാൻ ശ്രമിക്കുമ്പോഴും ശരീരത്തിന് ആവശ്യമായ വിറ്റാമിനുകളും ധാതുക്കളും മറ്റു പോഷകങ്ങളും ലഭ്യമാക്കിയില്ലെങ്കിൽ ഭാരം കുറയുന്നതോടൊപ്പം നിങ്ങളുടെ ആയുസ്സും കുറയും എന്നാണ് പഠനങ്ങൾ തെളിയിക്കുന്നത്.
ആരോഗ്യകരമായി ഭാരം കുറയ്ക്കാനായി ആഴ്ചയിൽ ഒരു കിലോ വീതം മാസത്തിൽ 4 കിലോ വരെ കുറയ്ക്കാവുന്നതാണ്. ഇതിനായി കാർബോഹൈഡ്രേറ്റ്സ് കൂടുതൽ അടങ്ങിയ ഭക്ഷണങ്ങൾ ഒഴിവാക്കിക്കൊണ്ട് ആവശ്യത്തിന് പ്രോട്ടീനും മറ്റും ലഭ്യമാകുന്ന ഭക്ഷണങ്ങൾ കഴിക്കേണ്ടതാണ്. ഒപ്പം അജയ്യിൽ അഞ്ചു ദിവസമെങ്കിലും 45 മിനിറ്റ് സമയത്തെ ചെറിയ വ്യായാമങ്ങളും ചെയ്യേണ്ടതാണ്. ഡയറ്ററി സപ്ലിമെന്റുകൾ പോലെയുള്ളവ കഴിച്ചുകൊണ്ട് ഭാരം കുറയ്ക്കുന്നത് ഭാവിയിൽ വലിയ അപകട സാധ്യതയുണ്ടാക്കും എന്നും തിരിച്ചറിയേണ്ടതാണ്. അതിനാൽ മികച്ച രീതിയിൽ നമ്മുടെ ആന്തരികാവയവങ്ങളെയും ശരീരത്തെയും സംരക്ഷിച്ചുകൊണ്ട് തന്നെ ആരോഗ്യകരമായി ഭാരം കുറയ്ക്കാൻ ശ്രദ്ധിക്കേണ്ടതാണ്
