ന്യൂഡൽഹി : ശബരിമല തീർത്ഥാടകർക്കായി സ്പെഷ്യൽ വന്ദേ ഭാരത് ട്രെയിൻ അനുവദിച്ച് ഇന്ത്യൻ റെയിൽവേ. ഡിസംബർ 15 മുതൽ 25 വരെയുള്ള കാലയളവിൽ നാലു ദിവസങ്ങളിൽ ആയിരിക്കും സ്പെഷ്യൽ ട്രെയിൻ സർവീസ് നടത്തുക. 15, 17, 22, 24 എന്നീ തീയതികളിൽ ആണ് ശബരിമല സ്പെഷ്യൽ ട്രെയിൻ സർവീസ് നടത്തുന്നത്.
ചെന്നൈ – കോട്ടയം റൂട്ടിലാണ് ശബരിമല സ്പെഷ്യൽ വന്ദേ ഭാരത് ട്രെയിൻ സർവീസ് നടത്തുന്നത്. തമിഴ്നാട്ടിൽ നിന്നും ശബരിമല ദർശനത്തിനായി എത്തുന്ന അയ്യപ്പഭക്തർക്ക് ഏറെ പ്രയോജനം ചെയ്യുന്ന ഒന്നായിരിക്കും ഈ പുതിയ വന്ദേ ഭാരത് സർവീസ്. ശബരിമലയിലെ തിരക്ക് കണക്കിലെടുത്താണ് റെയിൽവേ പ്രത്യേക ട്രെയിൻ അനുവദിച്ചിട്ടുള്ളത്.
ചെന്നൈ സെൻട്രലിൽ നിന്ന് പുലർച്ചെ 4.30 ന് സർവീസ് ആരംഭിക്കുന്ന ഈ സ്പെഷ്യൽ സർവീസ് ട്രെയിൻ വൈകുന്നേരം 4.15ന് ആയിരിക്കും കോട്ടയം റെയിൽവേ സ്റ്റേഷനിലെത്തുക. പിറ്റേദിവസം രാവിലെ 4.40ന് ഇതേ ട്രെയിൻ കോട്ടയം റെയിൽവേ സ്റ്റേഷനിൽ നിന്ന് പുറപ്പെട്ട് അന്ന് വൈകുന്നേരം 5.15ന് ചെന്നൈ സെൻട്രൽ സ്റ്റേഷനിൽ എത്തിച്ചേരുന്നതായിരിക്കും.
ചെന്നൈയിൽ നിന്ന് വെള്ളി, ഞായർ ദിവസങ്ങളിലും തിരിച്ച് കോട്ടയത്ത് നിന്ന് ശനി, തിങ്കൾ ദിവസങ്ങളിലുമാണ് സ്പെഷ്യൽ വന്ദേ ഭാരത് ട്രെയിൻ സർവീസ് നടത്തുക . പതിനാലാം തീയതി വ്യാഴാഴ്ച രാവിലെ എട്ടുമണി മുതൽ ടിക്കറ്റ് മുൻകൂർ ബുക്ക് ചെയ്യാൻ സാധിക്കുമെന്ന് ദക്ഷിണ റെയിൽവേ അറിയിച്ചു.
