തിരുവനന്തപുരം: ഭർതൃമതിയായ യുവതി ദുരൂഹ സാഹചര്യത്തിൽ ആത്മഹത്യ ചെയ്ത നിലയിൽ. തിരുവല്ലം വണ്ടിത്തടം സ്വദേശി ഷഹന ഷാജി (22) ആണ് മരിച്ചത്. ഷഹനയുടെ കുടുംബം ഭർതൃവീട്ടുകാർക്കെതിരെ പരാതിയുമായി രംഗത്തെത്തിയിട്ടുണ്ട്. സംഭവത്തിൽ തിരുവല്ലം പോലീസ് കേസെടുത്തു.
ചൊവ്വാഴ്ച വൈകുന്നേരം നാലരയോടെയാണ് സംഭവം നടന്നത്. ഭർത്താവിൻ്റെ വീട്ടിൽനിന്ന് മാറി താമസിച്ചിരുന്ന ഷഹാന മൂന്നുമാസമായി ഒന്നര വയസ്സുകാരിയായ മകൾക്കൊപ്പം സ്വന്തം വീട്ടിലായിരുന്നു താമസിച്ചിരുന്നത്
ചൊവ്വാഴ്ച സ്വന്തം വീട്ടിൽ നടക്കുന്ന ചടങ്ങിലേക്ക് ഷഹനയെയും മകളെയും കൊണ്ടുപോകാനായി ഭർത്താവ് നൗഫൽ എത്തിയിരുന്നു. എന്നാൽ ഷെഹന ഇതിന് തയ്യാറായില്ല . ഇതിനെ തുടർന്ന് മകളെയും കൂട്ടി നൗഫൽ മടങ്ങുകയായിരുന്നു. ഇതിനു പിന്നാലെ മുറിയിൽ കയറി വാതിലടച്ച ഷഹന ആത്മഹത്യ ചെയ്യുകയായിരുന്നു എന്നാണ് കുടുംബം പറയുന്നത്.
മരണത്തെ തുടർന്ന് പോസ്റ്റുമോ‍ർട്ടം നടപടികൾക്കായി ഷഹനയുടെ മൃതശരീരം തിരുവനന്തപുരം മെഡിക്കൽ കോളേജിലേക്ക് മാറ്റിയിട്ടുണ്ട് .അതേസമയം ഭർതൃവീട്ടുകാർക്കെതിരെ യുവതിയുടെ കുടുംബം ആരോപണം ഉന്നയിച്ചിട്ടുണ്ട്, എന്നാൽ വിശദാംശങ്ങൾ ലഭ്യമല്ല . സംഭവത്തിൽ തിരുവല്ലം പോലീസ് കേസ് എടുക്കുകയും യുവതിയുടെ കുടുംബത്തിന്റെ മൊഴി രേഖപ്പെടുത്തുകയും ചെയ്തു
