ലണ്ടൻ : ഭാരതി എൻ്റർപ്രൈസസിൻ്റെ സ്ഥാപകനും ചെയർമാനുമായ സുനിൽ ഭാരതി മിത്തലിന് അദ്ദേഹത്തിൻ്റെ സേവനങ്ങളും യുകെ, ഇന്ത്യ ബിസിനസ് ബന്ധങ്ങളിലേക്കുള്ള അദ്ദേഹത്തിൻ്റെ
സംഭാവനകളും കണക്കിലെടുത്ത് ബ്രിട്ടീഷ് സാമ്രാജ്യത്തിൻ്റെ ഏറ്റവും വലിയ രണ്ടാമത്തെ പദവിയായ കെബിഇ അഥവാ നൈറ്റ് കമാൻഡർ ഓണററി നൈറ്റ്ഹുഡ് ലഭിക്കും.
ടെലികോം, ബഹിരാകാശ ആശയവിനിമയം, ഡിജിറ്റൽ സൊല്യൂഷൻസ്, റിയൽ എസ്റ്റേറ്റ്, ഹോസ്പിറ്റാലിറ്റി എന്നിവയിൽ നിക്ഷേപങ്ങളുള്ള ഇന്ത്യയിലെ മുൻനിര ഒന്നാം തലമുറയിൽ പെട്ട കോർപ്പറേഷനുകളിലൊന്നായ ഭാരതി എൻ്റർപ്രൈസസിൻ്റെ സ്ഥാപകനും ചെയർമാനുമാണ് മിത്തൽ.
ഭാരതി എൻ്റർപ്രൈസസിൻ്റെ മുൻനിര കമ്പനിയായ ഭാരതി എയർടെൽ 17 രാജ്യങ്ങളിൽ പ്രവർത്തിക്കുന്ന ഒരു മുൻനിര ടെലികമ്മ്യൂണിക്കേഷൻ കമ്പനിയാണ്, കൂടാതെ ആഗോളതലത്തിൽ മികച്ച മൂന്ന് മൊബൈൽ ഓപ്പറേറ്റർമാരിൽ ഒരാളുമാണ്.
ഹാർവാർഡ് യൂണിവേഴ്‌സിറ്റിയുടെ ഗ്ലോബൽ അഡൈ്വസറി കൗൺസിലിലുള്ള അദ്ദേഹം ഹാർവാർഡ് ബിസിനസ് സ്‌കൂളിൽ ബോർഡ് ഓഫ് ഡീൻ അഡ്വൈസേഴ്‌സിലും സേവനമനുഷ്ഠിച്ചിട്ടുണ്ട്. GSM അസോസിയേഷൻ്റെ പ്രശസ്‌തമായ ചെയർമാൻ അവാർഡ് സുനിൽ മിത്തലിന് ലഭിച്ചു, കൂടാതെ ഇന്ത്യയിലെയും യൂറോപ്പിലെയും നിരവധി പ്രമുഖ സർവകലാശാലകൾ ഓണററി ഡോക്ടറേറ്റുകൾ നൽകി അദ്ദേഹത്തെ ആദരിച്ചിട്ടുണ്ട്.
ഇന്ത്യയുടെ ജി 20 പ്രസിഡൻസി കാലത്ത് ആഫ്രിക്കൻ സാമ്പത്തിക ഏകീകരണത്തെക്കുറിച്ചുള്ള ബി 20 ഇന്ത്യ ആക്ഷൻ കൗൺസിലിൻ്റെ ചെയർമാനായും മിത്തൽ സേവനമനുഷ്ഠിച്ചു.
സുസ്ഥിര വികസനത്തിനായുള്ള ഇൻ്റർനാഷണൽ ടെലികമ്മ്യൂണിക്കേഷൻ യൂണിയൻ/യുനെസ്‌കോ ബ്രോഡ്‌ബാൻഡ് കമ്മീഷനിൽ സേവനമനുഷ്ഠിക്കുന്ന കമ്മീഷണർ കൂടിയാണ് അദ്ദേഹം. വേൾഡ് ഇക്കണോമിക് ഫോറത്തിൻ്റെ ഇൻ്റർനാഷണൽ ബിസിനസ് കൗൺസിലിലും കൗൺസിൽ ഓൺ ഫോറിൻ റിലേഷൻസിലെ ഗ്ലോബൽ ബോർഡ് ഓഫ് അഡൈ്വസേഴ്‌സിലും അംഗമാണ്.
