ന്യൂഡൽഹി : ആം ആദ്മി പാർട്ടി എംപി സ്വാതി മലിവാളിനെതിരായ ആക്രമണത്തിൽ പ്രതികരിച്ച് നിർഭയയുടെ അമ്മ. സ്വാതിയെ താൻ വിശ്വസിക്കുന്നതായും എല്ലാ പിന്തുണയും നൽകുന്നതായും നിർഭയയുടെ അമ്മ വ്യക്തമാക്കി. ഏറെ വികാരാധീനയായി ആയിരുന്നു സ്വാതി ഈ പ്രതികരണം സ്വീകരിച്ചത്. നിർഭയയുടെ അമ്മയുടെ പിന്തുണയിൽ നന്ദിയുണ്ടെന്നും എന്നാൽ വൈകാതെ തന്നെ ചിലർ ആ അമ്മയെയും ബിജെപി ഏജന്റ് എന്ന് വിളിക്കുമെന്ന് ആശങ്കയുള്ളതായും സ്വാതി മലിവാൾ വ്യക്തമാക്കി.
നിർഭയയുടെ അമ്മയുടെ പ്രതികരണത്തിന്റെ വീഡിയോ സ്വാതി മലിവാൾ തന്റെ എക്സ് അക്കൗണ്ടിലൂടെ പങ്കുവെച്ചു. ഡൽഹി മുഖ്യമന്ത്രി അരവിന്ദ് കെജ്രിവാളിന്റെ വാക്കുകളിൽ എന്തെങ്കിലും ആത്മാർത്ഥതയുണ്ടെങ്കിൽ കുറ്റക്കാർക്കെതിരെ നടപടി സ്വീകരിക്കാൻ തയ്യാറാവണമെന്നും നിർഭയയുടെ അമ്മ ആവശ്യപ്പെട്ടു. കെജ്രിവാൾ ഇപ്പോഴും മുഖ്യമന്ത്രിയാണെന്ന് ഉള്ളത് മാത്രമല്ല അദ്ദേഹം പലപ്പോഴും ഡൽഹി നിവാസികളോട് പറയുന്നത് ഞാൻ നിങ്ങളുടെ സഹോദരനാണ്, മകനാണ് എന്നല്ലാമാണ്. ഈ പറച്ചിലിൽ എന്തെങ്കിലും കാര്യമുണ്ടെങ്കിൽ സ്വാതിയെ പിന്തുണയ്ക്കണം, കുറ്റക്കാർക്ക് എതിരെ അന്വേഷണം നടത്താനും കർശനമായ നടപടി സ്വീകരിക്കാനും തയ്യാറാവണം എന്നും നിർഭയയുടെ അമ്മ ആവശ്യപ്പെട്ടു.
പത്തുവർഷത്തോളമായി സ്ത്രീകൾക്ക് വേണ്ടി പ്രവർത്തിക്കുന്ന വ്യക്തിയാണ് സ്വാതി മലിവാൾ. ഈ കാലഘട്ടത്തിൽ നിരവധി സ്ത്രീകളെ അവർ സഹായിച്ചിട്ടുണ്ട്. അങ്ങനെയുള്ള ഒരാളെ സഹായിക്കാൻ ഡൽഹി മുഖ്യമന്ത്രി തയ്യാറാവണം എന്നും നിർഭയയുടെ അമ്മ പങ്കുവെച്ച വീഡിയോയിൽ ആവശ്യപ്പെടുന്നു.
