ഫാഷൻലോകത്ത് അതിവേഗം ട്രെൻഡ് ആയ ഒന്നാണ് ടാറ്റുകൾ. ആദ്യകാലത്ത് കൈകളിൽ മാത്രം ഇടംപിടിച്ചിരുന്ന ടാറ്റുകൾ അധികം വൈകാതെ തന്നെ ശരീരത്തിന്റെ മറ്റ് ഭാഗങ്ങളിലേക്കും വ്യാപിച്ചു. ശരീരത്തിൽ ടാറ്റു അടിയ്ക്കുന്നത് ആരോഗ്യപരമായി നല്ലതാണോ?. നമ്മളിൽ പലരുടെയും മനസ്സിൽ ഉദിച്ചിട്ടുള്ള ഈ ചോദ്യത്തിന് ഉത്തരം നൽകുകയാണ് സ്വീഡണിലെ ലൻഡ് സർവ്വകലാശാല.
ശരീരത്തിൽ ടാറ്റു അടിയ്ക്കുന്നവർക്ക് ലിംഫോമ അഥവാ ബ്ലഡ് ക്യാൻസർ വരാനുള്ള സാദ്ധ്യത കൂടുതലാണെന്നാണ് സർവ്വകലാശാലയുടെ കണ്ടെത്തൽ. പ്രൊഫസർ ഡോ. ക്രിസ്‌റ്റെൽ നീൽസണിന്റെ നേതൃത്വത്തിൽ നടത്തിയ പഠനത്തിന്റെ റിപ്പോർട്ട് ഇ ക്ലിനിക്കൽ മെഡിസിൻ എന്ന ജേണലിൽ ആണ് പുറത്തുവിട്ടിരിക്കുന്നത്. മറ്റുള്ളവരെ അപേക്ഷിച്ച് ടാറ്റു അടിക്കുന്നവർക്ക് ബ്ലഡ് ക്യാൻസർ വരാനുള്ള സാദ്ധ്യത 21 ശതമാനം കൂടുതലാണെന്നാണ് പറയുന്നത്.
20 നും 60 നും ഇടയിൽ പ്രായമുള്ള 12,000 പേരിലായിരുന്നു പഠനം. ഇവരിൽ ടാറ്റു അടിച്ച മൂവായിരം പേർക്ക് ബ്ലഡ് ക്യാൻസർ ഉൾപ്പെടെ ജീവന് ഭീഷണിയാകുന്ന രോഗങ്ങൾ കണ്ടെത്തി. ഇതിൽ 36 ശതമാനം പേർ യുവതീ-യുവാക്കൾ ആയിരുന്നു. രോഗം സ്ഥിരീകരിച്ച 22 ശതമാനം പേരുടെയും ശരീരത്തിൽ ഒന്നിൽ കൂടുതൽ ടാറ്റുകൾ ഉണ്ട്. പ്രായവും, പുകവലി ശീലമുള്ളവരിലുമാണ് മറ്റുള്ളവരെ അപേക്ഷിച്ച് ക്യാൻസർ സാദ്ധ്യത കൂടുതലായി കാണപ്പെടുന്നത് എന്നും പഠനം വ്യക്തമാക്കുന്നു.
ടാറ്റു അടിക്കുന്നതിലെ രാസവസ്തുക്കൾ ബി സെൽ ലിംഫോമ, ഫോളിക്യുളാർ ലിഫോമ എന്നീ ക്യാൻസറുകൾ ഉണ്ടാകാനാണ് കൂടുതൽ സാദ്ധ്യത. ലിംഫ് നോഡുകളിൽ മഷി അടിഞ്ഞു കൂടുന്നതാണ് രോഗത്തിലേക്ക് നയിക്കുന്നത്. ക്യാൻസർ കൂടാതെ ത്വക്കിലെ അണുബാധ, അലർജി എന്നിവയ്ക്കും കാരണമാകും.
കാറിൽ അടിയ്ക്കുന്ന പെയിന്റുകളിൽ ഉപയോഗിക്കുന്ന അസോ എന്ന ഡൈ ടാറ്റുവിനായുള്ള മഷികളിൽ ഉപയോഗിക്കാറുണ്ട്. എലികളിൽ നടത്തിയ പരീക്ഷണത്തിൽ ഇത് കരളിലെ ക്യാൻസറിന് കാരണം ആകുമെന്നാണ് കണ്ടെത്തൽ. അസോ അകത്ത് എത്തിയാൽ നമ്മുടെ കരളിനെയും ബാധിക്കാം. കാഡ്മിയം, ലെഡ്, മെർക്കുറി, പ്ലാസ്റ്റിക്, നിക്കെൽ തുടങ്ങിയവയാണ് മഷികളിലുള്ളത്. ഇവയെല്ലാം ശരീരത്തെ ദോഷകരമായി ബാധിക്കുന്ന ഘടകങ്ങളാണ്.
വ്യക്തിത്വം പ്രകടിപ്പിക്കുകയാണ് ടാറ്റു അടിക്കുന്നതിന് പിന്നിലെ പ്രധാന കാരണം. ജീവിതത്തിലെ ഓരോ ഘട്ടങ്ങളും ടാറ്റു രൂപത്തിൽ പതിപ്പിക്കുന്നവരും ഉണ്ട്. എന്നാൽ ഇങ്ങനെ ചെയ്യുമ്പോൾ ആരോഗ്യംകൂടി അൽപ്പം ശ്രദ്ധിക്കണമെന്ന് ഓർമ്മിപ്പുക്കുകയാണ് ലൻഡ് സർവ്വകലാശാലയുടെ പഠനം.
