കോഴിക്കോട് : 15 വയസ്സുകാരനായ മകനെ മർദ്ദിച്ച അച്ഛൻ അറസ്റ്റിൽ. കോഴിക്കോട് പേരാമ്പ്രയിലാണ് സംഭവം നടന്നത്. പേരാമ്പ്ര തയ്യുള്ളതിൽ ശ്രീജിത്തിനെ ആണ് പോലീസ് അറസ്റ്റ് ചെയ്തത്. അച്ഛനും രണ്ടാനമ്മയും ചേർന്ന് കുട്ടിയെ മർദ്ദിച്ചതായി പരാതി ലഭിച്ചതിനെ തുടർന്നാണ് പോലീസ് നടപടി സ്വീകരിച്ചിട്ടുള്ളത്.
ശ്രീജിത്ത് നിരന്തരമായി വീട്ടിൽ മദ്യപിച്ച് വന്ന് പ്രശ്നമുണ്ടാക്കാറുള്ളതായി നാട്ടുകാർ പോലീസിനെ അറിയിച്ചു. കഴിഞ്ഞദിവസവും ഇത്തരത്തിൽ മദ്യപിച്ച് വന്ന് പ്രശ്നമുണ്ടാക്കുന്നതിനിടെ 15 വയസ്സുകാരനായ മകനെ ഇയാൾ മർദ്ദിക്കുകയായിരുന്നു.
ക്രൂരമായ മർദ്ദനത്തെ തുടർന്ന് കുട്ടി വീട്ടിൽ നിന്നും ഇറങ്ങി ഓടി. തുടർന്ന് നാട്ടുകാർ ഇക്കാര്യം പോലീസ് സ്റ്റേഷനിൽ വിളിച്ച് അറിയിക്കുകയായിരുന്നു. പേരാമ്പ്ര പോലീസ് സ്ഥലത്തെത്തി അന്വേഷണം നടത്തിയ ശേഷം ശ്രീജിത്തിനെ അറസ്റ്റ് ചെയ്യുകയായിരുന്നു. കുട്ടിയുടെ രണ്ടാനമ്മയെ പോലീസ് കസ്റ്റഡിയിലെടുത്ത് ചോദ്യം ചെയ്ത ശേഷം വിട്ടയച്ചു.
