ശരീരത്തിന് പോഷണം ലഭിക്കണമെങ്കില്‍ എന്തെങ്കിലും ഭക്ഷണം വാരിവലിച്ച് കഴിച്ചിട്ട് കാര്യമില്ലെന്ന് എല്ലാവര്‍ക്കും അറിയാം. അതു പോലെ തന്നെ പ്രധാനമായ മറ്റൊരു കാര്യമാണ് നമ്മള്‍ ഭക്ഷണം എങ്ങനെ കഴിക്കുന്നുവെന്നതും. ഭക്ഷണം കഴിക്കുന്ന രീതികളിലുണ്ടാകുന്ന അപാകതകള്‍ മൂലം പലര്‍ക്കും പോഷണങ്ങള്‍ ശരിയായ അളവില്‍ ലഭിക്കില്ല.
ചിലരുടെ ഒരു മോശം ശീലമാണ് ഒരു കൈകൊണ്ട് ഭക്ഷണം വായിലേക്കും മറു കൈയില്‍ സ്‌ക്രോള്‍ ചെയ്തു കൊണ്ട് മൊബൈല്‍ ഫോണും ഇത് വളരെ അപകടകരമായ ഒരു ശീലമാണ് ഇത് നിങ്ങള്‍ തുടര്‍ന്ന് പോരുകയാണെങ്കില്‍ എത്ര ബാലന്‍സ്ഡ് ആയ ഡയറ്റ് ആണെങ്കിലും ഉദ്ദേശിക്കുന്ന ആരോഗ്യഗുണം ഉടനെയൊന്നും കിട്ടാതെ വരും.
മനസു നിറഞ്ഞു കഴിക്കുന്ന ഭക്ഷണത്തിന് ഗുണമേന്മയും കൂടുമെന്നാണ് പഴഞ്ചൊല്ല് ഭക്ഷണം കഴിക്കുന്നതിലല്ല, ഭക്ഷണം ആസ്വദിച്ചു കഴിക്കുന്നതാണ് മനസുനിറഞ്ഞു കഴിക്കുക എന്നത്. ഭക്ഷണം മെല്ലെ, ശ്രദ്ധയോടെ കഴിക്കുന്നത് നിങ്ങളുടെ ഭക്ഷണ തിരഞ്ഞെടുപ്പുകള്‍ മികച്ചതാക്കുന്നതിനൊപ്പം സംതൃപ്തിയും നല്‍കും. ഇത് വിശപ്പിനെ മനസിലാക്കാനും അമിതമായി ഭക്ഷണം കഴിക്കാതിരിക്കാനും ദഹനം മെച്ചപ്പെടുത്താനും സഹായിക്കും.
നമ്മള്‍ ഭക്ഷണം കഴിക്കുകയാണ് എന്ന് ബോധവാന്മാരാകുമ്പോള്‍ ഭക്ഷണം ചവച്ചു കഴിക്കാന്‍ നമ്മള്‍ ശ്രദ്ധിക്കും. ഇത് ശരീരത്തിന് ഭക്ഷണം എത്രത്തോളം ആവശ്യമാണെന്ന് തിരച്ചറിയാന്‍ സഹായിക്കും. ഭക്ഷണത്തിലെ ചേരുവകളും രുചിയും ശ്രദ്ധിക്കും. ഇനി ഇപ്പോള്‍ അത്ര ബാലന്‍സ്ഡ് ഡയറ്റ് അല്ലെങ്കില്‍ പോലും മനസുനിറഞ്ഞ് കഴിക്കുന്നത് ആരോഗ്യം മെച്ചപ്പെടുത്തുമെന്നാണ് ആരോഗ്യ വിദഗ്ധര്‍ പറയുന്നത്.
അതുപോലെ തന്നെ പ്രധാനപ്പെട്ട മറ്റൊരു കാര്യമാണ് നന്നായി വിശന്നതിന് ശേഷം മാത്രം ഭക്ഷണം കഴിക്കുക എന്നത്.
വിശപ്പാകുന്നതിന് മുന്‍പ് ഭക്ഷണം കഴിക്കുന്നത് പോഷകങ്ങള്‍ ആഗിരണം ചെയ്യുന്ന പ്രക്രിയ വൈകിപ്പിക്കും.വിശന്നു കഴിക്കുമ്പോള്‍ ഭക്ഷണത്തിന്റെ എല്ലാ പോഷകങ്ങളും കൃത്യമായി ശരീരത്തിന് ആഗിരണം ചെയ്യാന്‍ സാധിക്കും. വിശപ്പില്ലാതെ എത്ര ബാലന്‍സ്ഡ് ആയ ഭക്ഷണം കഴിച്ചാലും അത് പോഷകങ്ങളെ മുഴുവനായി ആഗിരണം ചെയ്യാന്‍ സഹായിക്കില്ല. അതുകൊണ്ട് വിശപ്പുണ്ടായതിന് ശേഷം മതി ഭക്ഷണം.
