ശ്രീനഗർ: ആർട്ടിക്കിൾ 370 ചരിത്രത്തിന്റെ ഭാഗമാണെന്നും ഒരിക്കലും തിരിച്ചുവരില്ലെന്നും ആഭ്യന്ത്രമന്ത്രി അമിത് ഷാ. ജമ്മുകശ്മീരിലെ നിയമസഭാ തെരഞ്ഞെടുപ്പിന് മുന്നോടിയായുള്ള ബിജെപിയുടെ തിരഞ്ഞെടുപ്പ് പ്രകടന പത്രിക പുറത്തിറക്കിക്കൊണ്ട് സംസാരിക്കുകയായിരുന്നു അദ്ദേഹം. ആർട്ടിക്കിൾ 370 ചരിത്രമായി മാറിയെന്നും ഒരിക്കലും തിരിച്ചുവരില്ലെന്നും രാജ്യത്തോട് മുഴുവൻ വ്യക്തമാക്കാൻ ഞാൻ ആഗ്രഹിക്കുന്നുവെന്ന് കേന്ദ്ര ആഭ്യന്തര മന്ത്രി പറഞ്ഞു.
ഇന്ത്യയുടെയും ജമ്മു കശ്മീരിന്റെയും ചരിത്രം എഴുതുമ്പോഴെല്ലാം, 2014 നും 2024 നും ഇടയിലുള്ള കാലഘട്ടം തങ്കലിപികളാൽ എഴുതപ്പെടുമെന്ന് അദ്ദേഹം ചൂണ്ടിക്കാട്ടി. ബിജെപിയുടെ പ്രകടനപത്രികയെ കുറിച്ച് സംസാരിച്ച കേന്ദ്രമന്ത്രി,ജമ്മു കശ്മീരിലെ രജൗരിക്ക് സമീപം ഒരു പുതിയ ടൂറിസ്റ്റ് ഹബ് വരുമെന്നും താഴ്വരയിൽ 5 ലക്ഷം തൊഴിലവസരങ്ങൾ സൃഷ്ടിക്കുമെന്നും പറഞ്ഞു.
ജമ്മുവിലും വിനോദസഞ്ചാര കേന്ദ്രങ്ങൾ സൃഷ്ടിക്കുമെന്നും കശ്മീരി പണ്ഡിറ്റുകൾ ഉൾപ്പെടെയുള്ള കുടിയിറക്കപ്പെട്ട സമൂഹങ്ങളുടെ ക്ഷേമം ബിജെപി ഉറപ്പാക്കുമെന്നും പ്രകടനപത്രികയിൽ പറയുന്നു.
ജമ്മു കശ്മീരിൽ തീവ്രവാദം പൂർണമായി ഉന്മൂലനം ചെയ്യുമെന്ന് ബിജെപി ഉറപ്പുനൽകുമെന്നും, തീവ്രവാദത്തിന്റെ ആവിർഭാവത്തിൽ ഉൾപ്പെട്ടവരുടെ ഉത്തരവാദിത്തം നിർണ്ണയിക്കാൻ ധവളപത്രം പുറത്തിറക്കുമെന്നും അമിത് ഷാ പറഞ്ഞു. 10 വർഷത്തിനുള്ളിൽ കേന്ദ്രഭരണ പ്രദേശം പരമാവധി ഭീകരതയിൽ നിന്ന് പരമാവധി ടൂറിസത്തിലേക്ക് മാറിയെന്ന് പ്രകടന പത്രിക പുറത്തിറക്കി അമിത് ഷാ പറഞ്ഞു.
