കോഴിക്കോട്: സാഹിത്യകാരൻ എംടി വാസുദേവൻ നായരുടെ വീട്ടിൽ നടന്ന മോഷണത്തിൽ പ്രതികൾ അറസറ്റിലായതിന് പിന്നാലെ കൂടുതൽ വിവരങ്ങൾ പുറത്ത്. എംടിയുടെ കോഴിക്കോട് നടക്കാവിലെ വീട്ടിലെ പാചകക്കാരിയും ബന്ധുവും ആണ് അറസ്റ്റിലായത്. ഇരുവരും എംടിയുടെ വീട്ടിൽ മോഷണം നടത്താൻ തുടങ്ങിയിട്ട് നാല് വർഷമായെന്നാണ് കണ്ടെത്തൽ.
നാല് വർഷമായി ഇരുവരും വീട്ടിൽനിന്നും ആഭരണങ്ങൾ മോഷ്ടിക്കുന്നു. ഓരോ ആഭരണങ്ങളായി അലമാരയിൽ നിന്നും എടുത്ത് മാറ്റുകയായിരുന്നു. കഴിഞ്ഞ മാസമാണ് കൂടുതൽ സ്വർണം അലമാരയിൽ നിന്നും എടുത്തത്. എന്നാൽ, അലമാരയുടെയോ വീടിന്റെയോ പൂട്ട് പൊളിക്കുയോ ചെയ്തിട്ടില്ല. വൻ രീതിയിലുള്ള കവർച്ച നടന്നിട്ടും പൂട്ട് പൊളിച്ചിട്ടില്ലെന്ന് കണ്ടെതോടെയാണ് വീട്ടുകാർക്ക് സംശയം തോന്നിയത്. മോഷണത്തിന്റെ ഒരുതരത്തിലുള്ള അടയാളങ്ങളും കണ്ടിരുന്നുമില്ല. ഇതോടെ, വീടുമായി ഇടപഴകുന്നവരെ തന്നെ ചുറ്റിപ്പറ്റി അന്വേഷണം നടത്തുകയായിരുന്നു. ഈ അന്വേഷണമാണ് ഒടുവിൽ ജോലിക്കാരിയുടെ നേർക്ക് തിരിഞ്ഞത്. ഇവരെ കൂടുതൽ ചോദ്യം ചെയ്തതിൽ നിന്നാണ് ബന്ധുവിലേക്കും അന്വേഷണം എത്തിയത്.
5 പവന്റെ ഉൾപ്പെടെ തൂക്കം വരുന്ന മൂന്ന് മാലകൾ, വള, രണ്ട് ജോഡി കമ്മലുകൾ, ഒരു ഡയമണ്ട് കമ്മൽ, ഒരു പവന്റെ ലോക്കറ്റ് മരതകം പതിച്ച ഒരു ലോക്കറ്റ് എന്നിങ്ങനെയുള്ള ആഭരണങ്ങളാണ് കവർന്നത്. ഇവയ്ക്ക് 16 ലക്ഷത്തോളം വിലവരുമെന്ന് പോലീസ് അറിയിച്ചു.
