ന്യൂഡൽഹി : അടുത്ത നാലു ദിവസത്തിനകം തന്നെ തുലാവർഷം എത്തുമെന്ന് അറിയിച്ച് കേന്ദ്ര കാലാവസ്ഥ വകുപ്പ്. അതേസമയം അറബിക്കടലിൽ നിലവിലുള്ള ന്യൂനമർദ്ദം അടുത്ത 12 മണിക്കൂറിനുള്ളിൽ തീവ്ര ന്യൂനമർദ്ദമായി ശക്തി പ്രാപിക്കുമെന്നും കാലാവസ്ഥ വകുപ്പ് മുന്നറിയിപ്പ് നൽകി. കൂടാതെ തെക്ക് കിഴക്കൻ ബംഗാൾ ഉൾക്കടലിലെ ചക്രവാതച്ചുഴി നാളെയോടെ പടിഞ്ഞാറൻ ബംഗാൾ ഉൾക്കടലിന്റെ മധ്യഭാഗത്ത് ന്യൂനമർദ്ദമായി ശക്തി പ്രാപിക്കാനും സാധ്യതയുള്ളതായി കാലാവസ്ഥ വകുപ്പ് വ്യക്തമാക്കി.
നാലു ദിവസത്തിനുള്ളിൽ തന്നെ രാജ്യത്ത് നിന്നും കാലവർഷം പൂർണമായി വിടവാങ്ങാനും സാധ്യതയുള്ളതായി കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്. കാലവർഷം വിടവാങ്ങുന്നതോടെ ആയിരിക്കും തെക്കേ ഇന്ത്യയിൽ തുലാവർഷം ആരംഭിക്കുക. നിലവിൽ വടക്കൻ തമിഴ്നാടിന് മുകളിൽ സ്ഥിതിചെയ്യുന്ന ചക്രവാതച്ചുഴിയും അടുത്ത ദിവസങ്ങളിൽ മഴയ്ക്ക് കാരണമാകാം.
ബംഗാൾ ഉൾക്കടലിലെ ചക്രവാതച്ചുഴി ന്യൂനമർദ്ദം ആകുന്നതോടെ വടക്കൻ തമിഴ്നാട്,പുതുച്ചേരി, തെക്കൻ ആന്ധ്രപ്രദേശ് തീരങ്ങളിലേക്ക് നീങ്ങാനും മഴയ്ക്ക് കാരണമാകാനും സാധ്യതയുണ്ട്. കേരളത്തിൽ അടുത്ത ഒരാഴ്ച വ്യാപകമായതോ നേരിയ ഇടത്തരം മഴക്കോ സാധ്യതയുള്ളതായും കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്. ഒക്ടോബർ 13 മുതൽ 17 വരെയുള്ള ദിവസങ്ങളിൽ ശക്തമായ മഴയ്ക്ക് സാധ്യതയുള്ളതായും കാലാവസ്ഥ വകുപ്പ് മുന്നറിയിപ്പ് നൽകി.
